"Erum að lækka á þá sem geta ekki borgað og hækka á þá sem geta það"

Stjórnarþingmenn og stjórnarandstaðan tókust á um réttmæti á breytingum á veiðigjaldinu á Alþingi í dag.

Stjórnarandstaðan lá meirihlutanum á hálsi fyrir að vera að gefa útgerðinni pening með fyrirhuguðum breytingum, sem fela í sér ýmist hækkun eða lækkun gjaldsins eftir fiskitegundum.

Helgi Hjörvar, þingmaður Samfylkingarinnar, sagði breytinguna „tíu milljarða gjafabréf til útgerðarmanna, lækkun veiðigjalds. Þetta er forgangsmál ríkisstjórnarinnar og er hér á sérstakri hraðferð í gegnum þingið með aukafundum."

Þessu var Þorsteinn Sæmundsson þingmaður Framsóknarflokksins ekki sammála. Hann sagði tilganginn vera annan. „Nú er í meðförðum atvinnumálanefndar frumvarp sem er til þess fallið, verði það að lögum, að bjarga klúðri síðustu ríkisstjórnar varðandi sérstakt veiðigjald." Því væri óhjákvæmilegt að gera breytingar á veiðigjaldinu.

Undir þetta tekur Jón Gunnarsson, þingmaður Sjálfstæðisflokksins. „Það er ekki deilt um það almennt hvort það eigi að greiða hér veiðileyfagjöld sérstaklega. Í þessari nálgun er verið að reyna að mæta þeim augljósu göllum sem eru á núgildandi lögum þar sem að litlar og meðalstórar útgerðir eiga mjög undir högg að sækja meðan á uppsjávarútgerðirnar bera þetta gjald miklu betur. Nálgunin er nákvæmlega þannig að það er verið að reyna að lækka gjöldin á þá sem hafa farið verst út úr þessu og hækka þau á móti á stórútgerðirnar sem eru í uppsjávarveiðunum,“ sagði Jón.