Vill stuðla að því að Hafnarfjörður eignist St. Jósefsspítala

Guðbjartur Hannesson velferðarráðherra vill stuðla að því að Hafnarfjarðarbær eignist St. Jósefsspítala ef áhugi er fyrir hendi hjá sveitarfélaginu sjálfu til þess að eignast húsnæðið.

Þetta kemur fram í frétt Fjarðarpóstsins í dag en spítalinn hefur ekki verið nýttur undir neina starfsemi í nokkurn tíma og er leitað leiða til þess að nýta þetta glæsilega hús sem var meira eða minna lagður niður sem spítali árið 2009.

Í samtali við Fjarðarpóstinn segir Guðbjartur að menn hafi velt vöngum yfir því í hvað hægt væri að nota húsnæði St. Jósefsspítala, en ljóst væri að ákvörðun um framtíðarnýtingu hússins yrði tekin í góðu samráði við bæjaryfirvöld. Húsið yrði ekki selt nema í samráði við bæjaryfirvöld.

Þrátt fyrir töluverða viðleitni hefur ekki fundist hentugur rekstur sem væri hægt að starfrækja í húsinu.

Hægt er að nálgast frétt Fjarðarpóstsins hér.