Halda áfram að safna undirskriftum

Yfir þrjátíu og þrjúþúsund manns hafa nú skrifað undir áskorun til ríkisstjórnarinnar um óbreytt veiðigjald. Aðstandendur undirskriftasöfnunarinnar fóru á fund atvinnuveganefndar í morgun og skýrðu sitt sjónarmið.

Fyrir sléttri viku síðan settu Agnar Kristján Þorsteinsson og Ísak Jónsson af stað undirskriftasöfnun á netinu með óbreyttu veiðigjaldi. Í morgun hittu þeir atvinnuveganefnd Alþingis til að skýra sín sjónarmið í málinu.

„Það sem mér fannst koma skýrt fram á þessum fundi var að það hefðu komið þarna málsmetandi menn fyrir nefndina og bent þeim á ýmsar tæknilegar úrlausnir, því þeir hafa kvartað yfir að lögin séu ekki framkvæmanleg. En ég held að það sé alveg ljóst að þau eru það en það þarf bara að vera vilji fyrir hendi," segir Ísak.

Nú hafa um þrjátíu og þrjúþúsund og fimmhundruð manns skrifað undir áskorunina til ríkisstjórnarinnar. Söfnunin heldur áfram þar til málið hefur farið í gegnum þingið.

„Við ætlum að sjá hvernig málið þróast á þingi, tímalengd undirskriftastöfnunum fer eftir því hvernig þessu máli vindur fram."

Ísak og Agnar fóru einir af stað en nú hefur bæst í hópinn.

„Við höfum bara verið að tala við svona fólkið í kringum okkur sem er áhugasamt um þetta. Það eru ýmsir aðrir sem koma að þessu en við tveir.  Það er bara allskonar fólk. Þetta tengist ekki stjórnmálasamtökum eða slíku. Þetta er bara fólk sem hefur áhuga á beinu lýðræði og áhuga á þessu málefni, þessu réttlætismáli og engin ástæða til að nefna nöfn þeirra að sjálfum sér," segir Ísak.