Hugsar ekki um neitt annað en börnin

Farbanni yfir Davíð Erni Bjarnasyni hefur verið aflétt og er hann væntanlegur til Íslands á næstu dögum. Hann var handtekinn á tyrkneskum flugvelli fyrir þremur vikum, sakaður um fornmunasmygl. Lífinu var umturnað, segir Davíð og fjölskyldan hlakkar til að fá hann heim.

Davíð var í fríi í Tyrklandi ásamt Þóru Björgu Birgisdóttur, konu sinni, og keyptu þau marmarastein sem reyndist vera fornmunur. Þung viðurlög liggja við fornmunasmygli í landinu og eftir fangavist sætti Davíð farbanni, þar til í gær. Hann bjóst ekki við að verða frjáls ferða sinna.

„Það var búið að segja við mig að ég þyrfti ekki vegabréfið en svo þurfti ég það svo það var beðið á meðan ég fór að sækja það. Það tók mig klukkutíma að fara fram og til baka. Ég kom á harðaspretti þarna inn og var sagt að dómararnir væru brjálaðir svo ég bjóst ekki við neinu," segir Davíð Örn.

Davíð kveðst hafa það ágætt, þrátt fyrir aðstæður.

„Maður er svona hálfklikkaður, farinn að tala við sjálfan sig maður er búinn að vera svo mikið einn hérna," segir Davíð.

Hann hlakkar mikið til að hitta fólkið sitt aftur. „Alveg hrikalega. Ég hugsa ekki um neitt annað en krakkana, konuna, fjölskylduna og vinina. Það er að drepa mann að geta ekki knúsað börnin sín."

Þóra vonast til þess að pappírar, sem heimila Davíð að ferðast, skili sér sem fyrst en óljóst er hvenær hann kemst heim. „Hann er rosalega einmana og hræddur og líður illa og ekki búinn að vinna úr því sem hann er búinn að lenda í," segir Þóra.

Ekki er vitað hvenær dómur fellur og óljóst er hvort Davíð þarf að vera viðstaddur. „Vonandi þarf hann ekki að fara aftur út, að það sé hægt að dæma þetta í fjarlægð og þá séum við bara að horfa á sekt. EF hann þarf að fara út held ég að maður sé að horfa á eitthvað annað en sekt," segir Þóra.

Þau Davíð og Þóra eiga þrjú börn, sem sakna að sjálfsögðu föður síns. „Þau voru mjög hress í gær. Það hafa allir fengið að tala við hann og það er alveg pínu spenna."

Fjölskyldan bjó í Svíþjóð en eftir handtökuna flutti Þóra til Íslands með börnin og hér hyggjast þau vera.

„Við eigum hvergi heima akkúrat núna heldur búum í ferðatösku. Þetta hefur ekki haft góð áhrif og það er búið að rífa krakkana úr öryggi. Við þurfum að byrja að byggja upp á nýtt þegar hann kemur til baka," segir Þóra.