Þingmenn fá svigrúm fram á mánudag

Ekki var boðað til þingfundar í dag og því kemur þing ekki saman fyrr en á mánudaginn.

Ekki var boðað til þingfundar í dag og því kemur þing ekki saman fyrr en á mánudaginn. Forseti Alþingis vill með þessu gefa forystumönnum svigrúm til að leysa þau ágreiningsmál sem uppi eru.

Venju samkvæmt er ekki blásið til þungfundar á sunnudögum og því liggur fyrir að næstu skref í stjórnarskrármálinu verði ekki rædd fyrr en á mánudaginn.

Ásta Ragnheiður Jóhannesdóttir, forseti Alþingis, tók þá ákvörðun í gær að boða ekki þingfundar í dag. Hún ítrekar að þessi ákvörðun hafi verið tekin til að formenn stjórnarflokkanna fái tækifæri til að ræða og leysa þessi ágreiningsmál.

Vonir vöknuðu í gær um að samkomulag um afgreiðslu mála og lok þingstarfa á Alþingi milli Sjálfstæðisflokks og stjórnarflokka væri í nánd.

Í samtali við fréttastofu sagði Bjarni Benediktsson, formaður Sjálfstæðisflokksins, að ósköp lítið hefði gerst í þessum viðræðum og að enn sé ágreiningur út af þingmálum. Hann sagði stjórnarflokkana vilja ræða breytingarákvæði stjórnarskrárinnar.

Ákvæðið auðveldar stjórnarskrárbreytingar á næsta kjörtímabili og að hægt verði að afgreiða þessar breytingar án þess að þær hafi verið samþykktar á tveimur þingum með alþingiskosningum á milli.

Bjarni segir það ekki vera sjónarmið sjálfstæðisflokksins að auðvelda stjórnarskrábreytingar á næsta kjörtímabili.

Sú hótun vofir enn yfir frá hópi stjórnarþingmanna að taka sig saman og beita sjötugustu og fyrstu grein þingskaparlaga um takmörkun ræðutíma, þannig að stjórnarskrármálið komist til atkvæða.