"Hér er erfitt að spila golf"

Bragi Benediktsson, bóndi á Grímsstöðum, segir að þegar hótel rísi á Grímsstöðum á Fjöllum verði hann farinn yfir móðuna miklu. Bragi er meðal íslenskra viðmælenda í úttekt New York Times á áhuga Huang Nubo á Grímsstöðum.

Tekið er hús á Braga á heimavelli á Grímsstöðum þar sem allt er þakið snjó. Þannig séu aðstæður frá september og líklega fram í maí. Jafnvel fyrir Íslendinga sem öllu séu vanir séu Grímsstaðir sérstaklega einangraður staður segir í greininni.

Össur Skarhéðinsson utanríkisráðherra, Ögmundur Jónasson innanríkisráðherra og Hjörleifur Sveinbjörnsson, vinur Hugan Nubo, ræða einnig við bandaríska miðilinn. Ögmundur segist hafa spurt Nubo fjölmargra spurninga varðandi áform sín en engin svör fengið.

„Viðskipaáætlunin virkaði aldrei mjög trúverðug," segir Ögmundur um tilætlanir Nubo að byggja vistvænt fimm stjörnu hótel með glæsilegum golfvelli. Ögmundur setur spurningamerki við plön Nubo.

„Maður verður að horfa á málið frá landfræðilegum og pólitískum vinkli og velta ástæðunum fyrir sér," segir Ögmundur.

Össur segist ekki hafa neitt við byggingu hótels að athuga. Hann sé þó hugsi yfir ástæðum þess að Nubo velji svo einangraðan stað vil þess að fjárfesta í.

„Maður getur því sem næst heyrt drauga dansa í snjónum," segir Össur sem skilur heldur ekkert í golfáætlunum Nubo.

Í greininni er velt upp mögulegum ástæðum þess að Kínverjar vilji fjárfesta hér á landi. Staðurinn sé nærri íslenskum fjörðum nærri olíuleitarsvæðum. Þá er minnt á siglingarleið sem reikna má með að opnist norðan Íslands í framtíðinni. Þá er minnst á orðróm að hermenn gætu dulbúist sem kylfusveinar til þess að komast inn í landið.

Össur segir Íslendinga vel meðvitaða um áhuga Kínverja á siglingaleið norðan landsins og að hafa starfstöð á Íslandi. Sögusagnir um áætlanir Nubo hafi hins vegar aðeins skaðað þau markmið Kínverja.

Hjörleifur Sveinbjörnsson, sem var skólabróðir Nubo á áttunda áratugnum, segir að Nubo hefði líkast til aldrei heyrt af Íslandi hefðu þeir ekki deilt herbergi saman í háskóla í Peking. Þótt hugmyndir Nubo virki að einhverra mati undarlegar sé Nubo ekki vitlaus maður að sögn Hjörleifs.

Hjörleifur segir að Grímsstaðir séu ekki fyrsti staður sem hann hefði valið til þess að fjárfesta í hér á landi. Þá er minnst er á fjárframlag Nubo til menningarsjóðs Íslands og Kína upp á 120 milljónir íslenskra króna.

Viðtalið í heild sinni má lesa á vefsíðu New York Times.