Ungur og óreyndur í aðalhlutverki

„Tilheyrir það ekki að vera smá stressaður fyrir frumsýningu? Ég er samt búinn að sjá nokkra búta úr myndinni og þá varð ég rosa spenntur því þetta leit svo vel út," segir Styr Júlíusson glottandi er blaðamaður spyr hvernig líðanin sé hjá ungum og óreyndum leikara nú þegar byrjað er að telja niður í frumraunina á hvíta tjaldinu.

Styr fer með hlutverk ólíkindatólsins Arnaldar í kvikmyndinni Falskur fugl sem verður frumsýnd þann 19. apríl næstkomandi.

Hann viðurkennir að honum hafi verið hent út í djúpu laugina með því að fá aðalhlutverkið í sinni fyrstu bíómynd.

„Ég fór aldrei í svona hefðbundnar prufur. Jón Atli (innskot. bl. Jónasson, handritshöfundurinn) er fjölskylduvinur og ég hafði áður farið í prufur fyrir hann varðandi önnur verkefni. Í staðinn fyrir að fara í prufur voru þetta nokkrir kaffihúsafundir með honum og leikstjóranum sem leiddu til þess að allt í einu var ég mættur á æfingu með leikurum. Þá fyrst áttaði ég mig að ég hefði fengið hlutverkið," segir Styr sem ber leikstjóranum, Þór Ómari Jónssyni, vel söguna.

Miðbæjarrotta

Styr er á tuttugasta aldursári og við nám í Menntaskólanum í Hamrahlíð en stefnir á útskrift í vor. Hann er fæddur og uppalinn í 101 Reykjavík með nokkurra ára viðkomu í París þar sem hann bjó ásamt móður sinni, Lindu Björgu Árnadóttur, fagstjóra fatahönnunardeildar Listaháskóla Íslands.

„Ég var í París milli 2-4 ára aldurs og skilst að ég hafi talað reiprennandi frönsku þá en var um þrjár vikur að gleyma henni eftir að ég kom aftur heim. Það er eiginlega synd," segir Styr og vill frekar kalla sig miðbæjarrottu en heimsborgara þrátt fyrir Parísardvölina.

Styr hóf sinn námsferil í Austurbæjarskóla, því næst Vesturbæjarskóla og svo Hagaskóla. Þá tók Menntaskólinn í Hamrahlíð við en hann kveðst ekki vera aktífur í félagslífinu, hvorki meðlimur í hinum fræga kór né leiklistarfélaginu. „Ég held að ég hafi heillast af týpunum í MH og þess vegna varð hann fyrir valinu. Ég hef á seinni árum tekið minni og minni þátt í félagslífinu og borgaði ekki einu sinni í skólafélagið í ár, sem er vandræðalegt að segja frá."

Með dansfætur

Fyrsta árið sitt í MH var Styr á listdansbraut en hann æfði bæði ballett og breikdans þegar hann var yngri. Hann hætti þó í dansinum eftir fyrsta árið í menntaskóla og skipti yfir á félagsfræðibraut.

„Í dag sé ég eiginlega eftir því að hafa hætt, það hefði verið fínt að hafa þessa kunnáttu betur slípaða í dag. Mér fannst þetta mjög gaman og held að það hafi bara verið þessi klassíska uppreisn á unglingsárunum sem fékk mig til að hætta á sínum tíma. Ég var enginn framúrskarandi dansari kannski en viðurkenni að ég er með dansfætur," segir Styr kankvís. Nú eru það helst dansgólf skemmtistaða miðborgarinnar sem fá að njóta danshæfileikanna.

Styr er ekki kominn úr leiklistarfjölskyldu eins og gjarna tíðkast hjá þeim sem feta þessa braut. Hann lék í nokkrum skólaleikritum á sínum tíma og var sendur að eigin frumkvæði í leiklistarbúðirnar Stagedoor Manor í New York sumarið þegar hann var 14 ára. Meðal þeirra sem hafa verið í þessum búðum eru frægir leikarar á borð við Natalie Portman, Robert Downey Jr. og Leah Michele úr sjónvarpsþáttunum Glee. „Ég var þar eitt sumar og naut mín í botn. Við settum meðal annars upp Hroka og hleypidóma sem var mikil reynsla. Svo hef ég leikið í nokkrum auglýsingum og verið duglegur að fara í prufur úti um allt."

Hver dagur var nýr áskorun

Eitt ár er síðan tökum lauk á myndinni Falskur fugl og segir Styr ferlið bæði krefjandi og lærdómsríkt en þetta var hans fyrsta upplifun af tökum á kvikmynd. Hann hafi verið umkringdur góðu fólki á tökustað sem skipti sköpum.

„Ég hefði ekki getað þetta án þessara snillinga sem voru á tökustað. Að fá að leika með elítunni eins og Hilmi Snæ, Þorsteini Bachmann og Ingvari E. eru þvílík forréttindi og gaman að fylgjast með þeim vinna. Svo var ég mikið með leikaranum Davíð Guðbrandssyni sem hjálpaði mér mikið," segir Styr. „Það sem kom mér mest á óvart var hversu duglegir allir voru, allt frá framleiðendum til þeirra sem sáu um matinn. Ég kannski sat í makindum mínum við að lesa handrit og það voru allir á hlaupum í kringum mig."

Kvikmyndin Falskur fugl er byggð á samnefndri skáldsögu eftir Mikael Torfason sem kom út árið 1997. Bókin vakti athygli á sínum tíma fyrir beinskeyttar lýsingar á hörðum heimi eiturlyfjanna. Styr segir að sér hafi verið ráðlagt að lesa ekki bókina fyrir tökur en hann hafi þó stolist í nokkra kafla. „Sögukennarinn minn í MH sagði að hann hefði lesið bókina á sínum tíma og verið andvaka í tvær nætur á eftir. Lýsingarnar í bókinni eru rosalega hrottafengnar og ég skil vel að þær hafi vakið athygli þegar bókin kom út. Þær mundu líklega gera það í dag líka."

Einangraði sig í tökunum

Styr ræðst ekki á garðinn þar sem hann er lægstur er hann bregður sér í hlutverk reiða og ofbeldishneigða unglingsins Arnaldar Gunnlaugssonar á hvíta tjaldinu. Styr segir Arnald eilítið einlægari í myndinni en hann kemur fyrir í bókinni.

„Hann er fullur af reiði og gremju sem hann réttlætir með sjálfsvorkunn. Hann er sjálfselskur og sér ekki að fólkið í kringum hann er líka að þjást. Mér finnst hann samt vera einlægur í sinni geðveiki," segir Styr, sem á ekki mikið sameiginlegt með Arnaldi. „Nei, það er ekki mikið líkt með okkur. Sagan sjálf fjallar samt um samskiptaleysi og meðvirkni í fjölskyldum og það er kannski eitthvað sem ég get skilið upp að vissu marki."

Styr segir að það hafi tekið á að lifa sig inn í hlutverkið og að hann hafi einangrað sig á meðan á tökum stóð. Skólinn fékk að líða þessa vorönnina en hann hafi náð öllum fögum þótt það hafi ekki verið með neinum glæsibrag. „Þetta var svolítið í takt við hlutverkið að mæta ekki í skólann. Það hefði verið erfitt að kúpla sig út og vera hress og glaður í skólanum á meðan maður brá sér svo í hlutverk reiða vandræðaunglingsins inn á milli. Þetta voru líka tólf tíma dagar og lítill tími auka. Kannski hjálpaði það bara í karaktersköpuninni að vera pínu stressaður yfir skólanum á meðan á tökuferlinu stóð?"

Stressaður og spenntur

Styr er bæði stressaður og spenntur yfir viðtökum myndarinnar. Hann ætlar að bjóða allri fjölskyldunni í bíó en er viss um að það verði undarleg bíóferð enda er hann sjálfur í mynd meiripart myndarinnar.

„Þetta verður vægast sagt undarlegt að sitja í bíósalnum og fylgjast með sjálfum sér. Ég er bæði stressaður og spenntur yfir þessu öllu saman," segir Styr og viðkennir að það versta sem gæti gerst væri að myndin fengi ömurlega dóma. „Það væri frekar glatað að fá lélegan dóm."

Styr er óþreyjufullur að klára skólann og stefnir út fyrir landsteinana eftir að hefur sett upp stúdentshúfuna í vor. Hann hefur löngum haft áhuga á kvikmyndum og er það þá evrópsk kvikmyndagerð sem heillar hann mest. Hann setur stefnuna á lærlingsstöðu hjá kvikmyndafyrirtæki í París á næsta ári en hann er spenntur fyrir öllum hliðum kvikmyndagerðar. Draumurinn er að gera sína eigin bíómynd í framtíðinni.

„Ég er spenntur yfir að klára skólann. Get eiginlega ekki beðið, þá fyrst verður maður frjáls eins og fuglinn og getur tekist á loft."