Aukinn skrifstofukostnaður Reykjavíkurmaraþoni um að kenna

Ársskýrsla Íþróttabandalags Reykjavíkur var kynnt á þingi bandalagsins um helgina. Í henni kemur fram að útgjöld við rekstur skrifstofu ÍBR nam rúmlega níutíu milljónum í fyrra og hefur kostnaðurinn hækkað mjög frá hruni. Var þetta gagnrýnt á þinginu.

Reyndar er kostnaðurinn skráður 41,7 milljónir. En þegar reksturinn er sundurliðaður sést að tekjufærðir stykir nema 47,5 milljónum sem lækka rekstrarkostnaðinn úr 90 milljónum í 41,7milljónir

Ingvar Sverrisson, formaður ÍBR, segir aukinn rekstrakostnað helgast af því að bandalagið tók að sér rekstur Reykjavíkurmaraþonsins árið 2003.

"Sá rekstur hefur verið rekinn og er rekinn á sérstakri kennitölu og sérstakur ársreikningur hefur verið um hann og sérstök stjórn samþykkir hann. En það eru ákveðin samlegðar áhrif sem eiga sér stað á skrifstofu íþróttabandalagsins við þennan viðburð sem Reykjavíkurmaraþonið er og reyndar Laugarvegshlaupið og Jónsmessuhlaupið sem er inn í þessu líka."

Sá kostnaður hafi þó ekki verið settur fram fyrr í reikningum íþróttabandalagsins þar sem hlaupin eru rekin á annarri kennitölu og sér ársreikningur sé um þau.

"Nú er kostnaður við rekstur Reykjavíkurmaraþonsins sýndur inn í þessari rekstratölu líka," segir Ingvar. Frá því ÍBR tók við hlaupinu hefur áhugi og þátttaka í því aukist mjög og hlaupum fjölgað.

"Gagnrýnin fjallar um það hvernig kostnaðurinn er settur fram en með fjölmennari hlaupum hefur auðvitað rekstrarkostnaðurinn aukist um leið og við þurfum fleiri starfsmenn til að reka hlaupið með svona mörgum þátttakendum."

Þá hefur verið gagnrýnt að ÍBR átti 128 milljónir í handbæru fé í sjóði en nú nemur það 47 milljónum þar sem ákveðið var að nota féð í endurbætur á húsnæði fremur en að veita því til íþróttabandalagana. Ingvar segir félagið hafa fengið féð lánað hjá sjálfu sér til að bæta aðstöðu fatlaðra og uppfylla kröfur um öryggi gegn jarðskjálftum.

En á sama tíma og rekstrakostnaður vegna skrifstofufólks og steinsteypu eykst hafa styrkir til afreksfólks frá ÍBR dregist mjög saman og námu í fyrra aðeins um þremur milljónum, er forgangsröðunin rétt?

"Jú, styrkir til afreksfólks hafa dregist saman, því miður, vegna þess að það var afrekssjóður rekinn hér fyrir hrun af ÍBR samvinnu við SPRON og við vitum hvernig það fór. Við vorum svo með framlag frá Reykjavíkurborg sem lagðist alveg af."

Segir Ingvar að unnið hafi verið að því að bæta stöðuna, það sé til dæmis hægt með því að reka viðburði eins og Reykjavíkurmaraþon sem gefa kost á því að auka fé í afrekssjóði.

"Um leið er Reykjavíkurmaraþon að stækka og þá erum við að greiða meira til félagana sem standa í sjálfboðavinnu með okkur til að halda utan um það."