Teflt til heiðurs Hemma á Grænlandi

Hrafn Jökulsson er staddur á Grænlandi á Skákhátíð vináttu Íslands og Grænlands sem haldin í gleymda bænum.

Liðsmenn Skákfélagsins Hróksins hafa síðustu daga verið í Upernavik, sem er á 73° breiddargráðu á vesturströnd Grænlands. Íbúar þar eru um 1200, og hefur Upernavik verið kallaður ,,gleymdi bærinn á Grænlandi" því mjög sjaldgæft er að þangað komi gestir, síst í skammdeginu.

Hrafn Jökulsson forseti Hróksins segir að ferðin hafi verið hin ævintýralegasta og gengið mjög vel. „Bæjarbúar á öllum aldri hafa tekið okkur fagnandi. Við fengum samkomuhúsið til umráða og á laugardaginn héldum við Vináttuhátíð Íslands og Grænlands. Ótal bæjarbúar á öllum aldri komu og tefldu og glöddust með okkur. Öll börnin fengu gjafir frá íslenskum fyrirtækjum, og mörg sýndu ótrúlega leikni í skákinni eftir lágmarkstilsögn.“

Teflt fyrir Hemma

Hátíð Hróksmanna í Upernavik er tileinkuð minningu Hermanns Gunnarssonar, sem var ástríðufullur skákmaður og átti mikinn þátt í að auka vinsældir skákarinnar á Íslandi. „Við Hemmi vorum góðir vinir og tefldum margoft í gegnum árin. Það stóð alltaf til að hann kæmi með okkur til Grænlands, og því þótti okkur við hæfi að tileinka þessa hátíð gleði og vináttu nafni Hemma Gunn.“

Auk hátíða í samkomuhúsi Upernavik hafa Hróksmenn heimsótt félagsheimili fyrir unglinga, athvörf fyrir fólk með geðraskanir og á mánudag liggur leiðin meðal annars í grunnskólann og leikskólann.

Á sunnudag nutu leiðangursmenn leiðsagnar Ingibjargar Gísladóttur sem starfar á flugvellinum í Nuuk, og átti frumkvæði að heimsókninni.

„Upernavik er lítil eyja, aðeins 8 ferkílómetrar að stærð, en miðstöð fyrir 10 lítil þorp sem eru í grenndinni. Ég hef ferðast vítt og breytt um Grænland, en náttúran og mannlífið hér í Upernavik eru engu lík. Viðmót fólksins, bæði barna og fullorðinna, er líka svo elskulegt og jákvætt að okkur langar helst ekkert að fara strax aftur.“

Vináttubönd efld

Hrafn er í Upernavik ásamt Jósep Gíslasyni, en á sama tíma heldur Róbert Lagerman varaforseti Hróksins uppi skákfjörinu í Nuuk, höfuðborg Grænlands.

„Markmið okkar frá upphafi ekki bara verið að kynna þjóðaríþrótt Íslendinga fyrir okkar næstu nágrönnum, heldur ekki síður að efla vináttu og samvinnu þjóðanna á sem flestum sviðum. Grænlendingar horfa mjög til okkar, og vilja aukna samvinnu og samstarf. Við eigum samleið með vinum okkar og nágrönnum í norðrinu.“

Sérlegur verndari hátíðarinnar í Upernavik er Jóhanna Kristjónsdóttir, móðir Hrafns.

„Mamma hefur frá upphafi stutt starf okkar meðal grænlenskra barna með ráðum og dáð. Hún hefur líka verið mér óendanlegur innblástur með starfi í þágu barna, jafnt á Íslandi sem í Austurlöndum.“