Moyes á von á kaldri kveðju

David Moyes segir að það komi sér ekkert lengur á óvart í knattspyrnunni en hann mætir sínu gamla liði í fyrsta sinn kvöld.

Moyes tók við af Alex Ferguson sem knattspyrnustjóri Manchester United í sumar eftir ellefu góð ár hjá Everton. Liðin mætast á Old Trafford í kvöld.

„Ég á von á öllu þegar að knattspyrnuáhugamenn eru annars vegar en ég vona að stuðningsmenn Everton séu meðvitaðir um söguna,“ sagði Moyes við enska fjölmiðla.

„Á fyrstu tíu árum ensku úrvalsdeildarinnar náði Everton í efri hluta deildarinnar kannski einu sini. Á síðari áratugnum vorum við reglulega á meðal tíu efstu,“ bætti hann við.

„Menn gera sér því vonandi grein fyrir því að ég hjálpaði til að koma félaginu á rétta braut. Ég átti frábært samband við stuðningsmenn liðsins en nú er ég hjá Manchester United. Og stuðningsmenn Everton munu vitaskuld styðja sitt lið í kvöld.“

Moyes segir að hann væri örugglega enn hjá Everton ef hann hefði ekki fengið tilboðið frá Manchester United.

„Sir Alex hringdi í mig fjórum eða fimm vikum áður en tímabilinu lauk. Ef hann hefði ekki hringt væri ég væntanlega enn að starfa sem stjóri Everton.“