Vill leggja Listaháskólann niður í núverandi mynd

Sigríður Heimisdóttir, iðnhönnuður, gagnrýnir Listaháskóla Íslands í viðtali í Nýju lífi sem kom út í gær og segist vilja leggja hann niður í núverandi mynd. Í viðtalinu gagnrýnir hún einnig fyrrverandi rektor skólans, Hjálmar Ragnarsson.

Gagnrýni hennar á háskólann snýr að rýru vöruhönnunarnámi og ófaglegum ráðningum. Sigríður hefur kennt í yfir 20 háskólum og einnig gegnt stjórnunarstöðum stærstu hönnunarfyrirtækjum heims.

Í viðtalinu lýsir Sigríður skoðunum sínum á vöruhönnunarnámi skólans og segir það ekki undirbúa nemendur nægilega vel undir atvinnulífið. Segir hún að hönnunarbrautir og arkitektúr LHÍ megi flytja undir Háskólann í Reykjavík. „Ég sé enga glóru í því að starfrækja sjö háskóla á þessu litla landi. Svo mætti flytja myndlistina í Háskóla Íslands við hliðina á heimspekinni.“

Sigríður hefur sótt um starf hjá skólanum þrisvar sinnum en ekki fengið starf. Segir hún að Hjálmar hafi sniðgengið sig. „Þar sem þetta gerðist stuttu áður en hann hætti er ekki hægt að hanka hann á ófaglegri ráðningu eða veita honum áminningu.“ Nú hefur Sigríður ráðið sig í stjórnunarstöðu við höfuðstöðvar IKEA.

„Stuttu eftir að ég flutti til Íslands var auglýst staða fagstjóra við vöruhönnunardeild skólans. Ég sótti um og lýsti því hvernig mér þætti þurfa að breyta fyrirkomulagi námsins. Á endanum var umsókn minni um starfið hafnað en mér sagt að skólinn vildi endilega nota mig í kennslu. Í kjölfarið hafði ég samband við þáverandi rektor og bað um rökstuðning fyrir því hvers vegna ég hafi ekki verið ráðin. Þá barst mér kuldalegt svar, að þeim bæri engin skylda til að rökstyðja sínar ákvarðanir.“

Síðar sótti Sigríður um hálfa stöðu lektors við vöruhönnunardeild og segist hún í viðtalinu vera fyllilega hæf í það starf. „En í staðinn var ráðinn tiltölulega nýútskrifaður hönnuður. Þetta er svo grátbroslegt,“ segir Sigríður. Henni þykir kaldhæðnilegt að eftir tilraunir umsóknir hennar var hún í hópi fimm, sem þóttu hæfastir um rektorstöðu við skólann. Hún dró þá umsókn til baka áður en ráðið var í starfið.