Það styttist óðum í jólin og er undirbúningur víða kominn vel á veg. Jólageithafurinn við IKEA er risinn og einhverjir sömuleiðis byrjaðir að setja upp jólaljós.

Jólin eru tími ljóssins og þegar daginn tekur að stytta eru jólaljós kærkomin leið til að lýsa upp skammdegið. Ómar Valdimarsson, fjölmiðlamaður hjá Bloomberg fréttastofunni, tók af skarið og er langfyrstur í sínu hverfi til að setja upp jólaljós.

„Ég ætlaði að vera á undan IKEA en tókst það ekki alveg. Ég tvær litlar stelpur sem eru rosalega hrifnar af ljósunum og eiginkonan ekki síður,“ segir Ómar. Er ekki dýrt að vera með öll þessi jólaljós?

„Það er svolítið dýrt að láta ljósin loga allan sólarhringinn og ég er með birtuskynjara sem slekkur á ljósunum yfir allra bjartasta tíma dagsins og það dregur aðeins úr kostnaðinum,“ svarar Ómar. „Það er gaman að fá smá birtu og hlýju. Jólin eru svo stutt þannig að það er um að gera að teygja aðeins á þeim.“

Landsmenn fyrr á ferðinni í jólainnkaupum

Landsmenn eru greinilega farnir að huga að jólunum enda er uppselt á fjölda jólatónleika sem verða á dagskrá fyrir jólin. Í IKEA í Garðabæ er allt klárt fyrir jólin. Þórarinn Ævarsson, framkvæmdastjóri IKEA á Íslandi, segir að verslun hjá fyrirtækinu aukist talsvert á mánuðunum fyrir jól.

„Við reynum að miða við að 15. október sé allt tilbúið hjá okkur. Ég myndi segja að landsmenn séu fyrr og meira á ferðinni í ár en síðustu ár,“ segir Þórarinn.

Sex metra sænskur geithafur er risinn á ný við IKEA en hann hefur orðið fyrir barðinu á skemmdarvörgum á síðustu árum. Búið er að girða geithafinn af með rafmagnsgirðingu.

„Við fórum í landbúnaðarverslun og fengum okkur alvöru hestagirðingu og reistum í kringum hann til að forða honum frá því að verða brennivörgum að bráð. Við vonum að geithafurinn fái að vera í friði.“