Reykurinn er eins og það sé sífellt verið að kveikja sinueld í garðinum

„Það liggur reykur hér yfir öllu, mismikill eftir því hver vindáttin er og þetta er svolítið eins og það sé sífellt verið að kveikja sinueld í garðinum hjá þér,“ segir Logi Karlsson, doktorsnemi í markaðsfræði við Háskólann í Wollongong í Ástralíu. Hann segir eldana þá verstu sem Ástralar hafa lent í 50-60 ár.

Ekkert lát virðist vera á eldunum sem eru í Suður Wales fylki. Logi segir að versti dagurinn verði á morgun samkvæmt veðurspám.

Hann segir stemmninguna í bænum vera dapra, en það eru eldar í um 30 kílómetra frá bænum sem hann býr í. Bændur í nágrenninu og aðrir sem eiga eitthvað undir eru hræddir en slökkviliðið hefur viðurkennt að ráða ekki neitt við neitt.

„Þegar maður sér slökkviliðsstjórann grátandi í kvöldfréttunum í sjónvarpinu þá skynjar maður alvarleika málsins. Þeir játa einfaldlega að þeir ráði ekki við þetta, enda hafa þeir aldrei lent í þessu á þessum skala áður,“ segir Logi.

Logi segir að á morgun eigi að bæta í vindinn þannig að eldurinn muni dreifast enn hraðar þó það hafi samt verið nokkuð hvasst undanfarna daga. Hann segir hitann á svæðinu hafa verið um 30 gráður en einhver hitalækkun sé í kortunum. Þá segir Logi að menn voni innilega að það fari fljótlega að rigna.