Segja 137 grafna í rústum verslunarmiðstöðvarinnar

Al Shabab, samtök herskárra íslamista í Sómalíu, saka herinn í Kenía um að hafa notað efnavopn í verslunarmiðstöðinni í Naíróbí, þegar gíslatökumenn þar voru yfirbugaðir.

Þá segja þeir að herinn hafi sprengt þrjár hæðir til að fela ummerkin, og 137 manns liggi þar grafnir í rústunum.

Manoah Esipisu var snöggur að bera þessar ásaknir til baka, engin efnavopn hafi verið notuð. Þá fullyrðir hann að enn viti stjórnvöld ekki til þess að fleiri en 61 hafi látist, auk tveggja árásarmannanna.

„Al Shabab eru þekkt fyrir galnar ásakanir og það er ekki nokkur sannleiksarða í því sem þeir segja,” segir hann.

Embættismenn í Kenía segja þó allar líkur á því að tala látinna eigi eftir að hækka. Allt að tugir líka geti enn verið inni í verslunarmiðstöðinni.

Liðsmenn Al Shabab réðust á laugardag inn í verslunarmiðstöðina Westgate í Naíróbi, höfuðborg Kenía, og tóku þar hundruð manna í gíslingu. Her og lögregla í Kenía réðst til atlögu gegn gíslatökumönnunum á mánudag og hafa handtekið ellefu þeirra.