Eiður Smári: Þurfum að vera óhræddir við að tefla fram okkar bestu mönnum

„Ég held að sérstaklega í fyrri hálfleik höfum við spilað frábærlega á köflum og það var virkilega gaman að vera inn á,“ sagði Eiður Smári Guðjohnsen sem kom inn í byrjunarlið Íslands fyrir leikinn og þakkaði traustið með góðum leik.

„Auðvitað fáum við smá gusu í andlitið með að lenda undir en það er eins og ekkert hafi áhrif á okkur þessa dagana. Við létum það alls ekki ýta okkur út af laginu og héldum bara áfram og trúðum því sem við vorum að gera og það virkaði.

„Kannski duttu gæðin úr leiknum eftir að við komumst í 2-1. Við bökkuðum aðeins of mikið og við ætluðum bara að halda í þrjú stig sem tókst. Þetta var ekki fallegt í lokin en þetta þarf ekki alltaf að vera fallegt.

„Ég er sérstaklega ánægður með varnarlínuna í dag. Hún hefur fengið á sig smá krítík fyrir síðasta leik og hvort sem hún sé sanngjörn eða ekki þá sýndum þeir í dag hvers þeir eru megnugir og bara allir saman. Ég held að það hafi hverið stór munur á því að bæði miðjan og fram á við vörðumst við mjög þétt,“ sagði Eiður sem var klár í að skora sjálfur þegar Birkir Bjarnason jafnaði metin.

„Ég var eignilega með hann en Birkir öskraði svo hátt að ég lét hann fara. Mér brá svo að heyra í Birki að ég hálfpartinn lét hann fara og hann setti hann inn. Ég vil nú meina að hann hafi komið við mig síðast,“ sagði Eiður og glotti við tönn.

„Ég er í fótbolta til að byrja leiki. Ég er í þessu til að byrja leiki og auðvitað fannst mér það frábært en aðalatriðið er að við unnum og sérstaklega að við höfum spilað svona vel. Við náðum að halda spilinu áfram frá því í seinni hálfleik í Sviss. Við tókum hann með okkur, sérstaklega í fyrri hálfleik, eða í um fimmtíu mínútur sem er frábært og sýnir gæðin í liðinu og sýnir það líka að við þurfum að vera óhræddir við að tefla fram okkar bestu mönnum.

„Helst myndum við vilja vera í fyrsta sæti en raunhæft markmið er annað sætið og við tókum stórt skref í dag og það eru tvö stór skref eftir. Þetta eru mjög spennandi tímar.

„Það er best að hafa hlutina í okkar eigin höndum og þá getum við engum öðrum um kennt nema sjálfum okkur eftir á. Við höfum öllu að tapa og ég held að við höfum gert okkur grein fyrir því fyrir leikinn í dag. Við vissum að ef við myndum spila á okkur bestu getu að við myndum vinna leikinn.

„Ég hef verið heppinn og oft spilað fyrir framan fullan völl hér í Laugardalnum og jafnvel meira en það. Það er frábært og sérstaklega í svona veðri. Við erum mjög þakklátir fyrir stuðninginn sem við höfum fengið og það er ekki sjálfgefið í íslensku haust veðri,“ sagði Eiður Smári að lokum.