Segir refsiaðgerðir ólöglegar

Sigurður Ingi Jóhansson, sjávarútvegs- og landbúnaðarráðherra, hefur kallað eftir fundi með ráðamönnum Noregs, Færeyja og Evrópusambandsins vegna makríldeilunnar. Á vefsíðunni Thefishsite.com kemur fram að Sigurður Ingi vilji leita sátta í málinu.

Beiðnin barst um miðjan júlí og vonaðist Sigurður Ingi eftir að fundurinn yrði haldin í ágúst. Nú er ljóst að fundurinn fer fram í september, vegna beiðni fleiri ríkja sem deilan snertir.

Sigurður Ingi segir á vefsíðunni að að samningaviðræður þoli enga bið eins og staðan er orðin. Hann segir að Ísland hafi leitt viðræðurnar hingað til og að gífurlega mikilvægt sé að finna lausn sem allir deiluaðilar eru sáttir við.

Sigurður Ingi segir hótanir Evrópusambandsins um refsiaðgerðir ekki gera neitt annað en að hægja á ferlinu við að finna lausn á deilunni. Þá bætir hann því við að slíkar aðgerðir séu ólöglegar. Hann segir að Íslendingar séu tilbúnir að leggja sitt að mörkum til að tryggja velferð vist og - hagkerfis landsins, sem og Norður - Atlantshafsins.