Ekkert lát á leiðindaveðri

Ekki sér fyrir endann á þeirri ótíð sem verið hefur að undanförnu.

Frá því var greint á Vísi í morgun að umferð til höfuðborgarinnar, þessa einu mestu ferðahelgi ársins, hefði verið óvenju lítil og er það samadóma álit lögreglumanna á Suðvesturlandi: Umferðin um helgina var mun minni en búist var við og talsvert minni en sömu helgi í fyrra. Þetta er rakið til leiðindaveðurs. Menn eru nú farnir að spyrja sig hvort ótíðin fari ekki í sögubækur? Óli Þór Árnason veðurfræðingur segir að það fari eftir því hvaðan er horft, sumarveðrinu hefur verið misskipt. Í Reykjavík var meðalhiti í júní 9,9 stig sem er 0,6 stigum undir meðallagi síðustu tíu ára. Júní árið 2011 var þó kaldari en nú. Meðan hefur verið óvenju hlýtt á Akureyri. Þar var meðalhitinn 11,4 stig og hefur ekki verið svo hár í sextíu ár eða síðan 1953. Ótíðin stefnir ekki í sögubækur.

"Í raun ekki. Þetta er meira eins og sumrin voru hér áður fyrr. Við erum bara orðin svo góðu vön eftir mjög góð síðustu þrjú til fjögur ár," segir Óli Þór.

Veðurfræðingum virðist reyndar einkar lagið að bera sig vel og gera lítið úr leiðinda veðri. Landsmenn þeir sem búa á Suð-Vesturhorninu fá því ekki að orna sér við fjálglegar yfirlýsingar um að þetta sé versta sumar í manna minnum. Það þrátt fyrir að ekkert annað sé í kortunum en suddinn einn og lægðagangur:

"Lengst af verður það, já. Það koma náttúrlega dagar með einhverjum götum en það er mikill lægðagangur sem kemur úr suð-vestri hér upp að landinu og þar af leiðandi rignir mest á okkur hér á Suð-Vesturlandinu."

Þar hafa menn það... regnfataframleiðendur gleðjast en golfarar og grillarar gráta. Í það minnsta á Suð-Vesturhorninu.

Hægt er að fylgjast nánar með veðurspánni á Veðursíðu Vísis.