Viðar á það til að henda sér niður

Rúnar Kristinsson, þjálfari KR, var efins um að Fylkismaðurinn Viðar Örn Kjartansson hafi reynt að standa í lappirnar er hann var spjaldaður fyrir leikaraskap í leik liðanna í kvöld.

Fylkismenn vildu meina að Brynjar Björn Gunnarsson hefði átt að fá sína aðra áminningu í leiknum fyrir meint brot en dómari leiksins var á öðru máli, eins og Rúnar.

„Þetta var alltof langt frá mér og sá ég því þetta ekki almennilega. Þekkjandi Viðar þá finnst mér ekkert ólíklegt að hann hafi hent sér niður. Mér fannst hann gera það nokkrum sinnum í leiknum - að henda sér niður að óþörfu. Þetta er smá ljóður á hans leik hversu oft hann hendir sér í jörðina," sagði Rúnar.

KR vann leikinn, 3-2, en nánari umfjöllun um hann má lesa hér.