Ráðherra segir ekki við hæfi að LÍN loki snemma vegna veðurs

Skrifstofur LÍN lokuðu snemma í dag vegna veðurs. Menntamálaráðherra segir það ekki ganga að opinberar stofnanir starfi ekki eftir auglýstum opnunartíma.

Þegar gestir Lánasjóðs íslenskra námsmanna hugðust sækja þangað þjónustu eftir klukkan tvö í dag blöstu við þessi skilaboð: „Skrifstofan verður lokuð frá kl. 14 í dag, 21. júní, vegna veðurs. Gögn má setja í póstkassa í anddyrinu.“ Efnislega sama tilkynning var sett á vefsíðu LÍN.

Fréttastofan óskaði eftir viðbrögðum menntamálaráðherra við þessu.

Nú skipar þú stjórn þessarar stofnunar sem fagráðherra málaflokksins. Hvað finnst þér um að LÍN loki snemma dags vegna veðurs til að hleypa embættismönnum stofnunarinnar út í sólina? „Ég kann ekki við það. Það finnst mér ekki við hæfi. Það er auglýstur opnunartími og hann á að gilda. Ég hafði ekki heyrt þetta, ég er að heyra þetta í fyrsta sinn. Mér finnst það ekki við hæfi. Þetta er þjónustustofnun og hún á að veita þjónustu á þeim tíma sem er auglýstur opinn. Ég auðvitað veit að það er ekki oft sól hér á Íslandi en vinnan verður nú að ganga fyrir,“ segir Illugi Gunnarsson, menntamálaráðherra.

Fréttastofa reyndi að ná sambandi við starfsfólk stofnunarinnar í dag til að fá viðbrögð, en eins og fyrr segir var lokað vegna veðurs.