Íslendingar áminntir fyrir brot á kynjareglum Evrópuráðsþings

Þingmenn á Evrópuráðsþinginu gera alvarlegar athugasemdir við skipan Íslandsdeildar þingsins á sumarþingi ráðsins sem nú fer fram. Skipan íslensku sendinefndarinnar samræmist ekki reglum um kynjakvóta. Enginn aðalnefndarmaður íslensku sendinefndarinnar er kvenkyns og gagnrýna þingmenn annarra ríkja þá staðreynd. 

Portúgalski þingmaðurinn José Mendes Bota, kvaddi sér hljóðs á þinginu og benti á að reglur Evrópuráðsþingsins kvæðu á um að sendinefndir einstakra þjóðþinga skyldu skipaðar konum að minnsta kosti í sama hlutfalli og á viðkomandi þingi, eða í allra minnsta lagi skyldi vera ein kona í Íslandsdeildinni. „En þeir eru allir karlar“. Bota var studdur yfir tíu öðrum þingmönnum sem viðstaddir voru umræðurnar, úr sendinefndum fimm mismunandi ríkja eins og þingsköp Evrópuráðsþingsins kveða á um.

Í Íslandsdeild Evrópuráðsþingsins eru fulltrúar þriggja stjórnmálaflokka þeir, Karl Garðarsson, formaður, Brynjar Níelsson og Ögmundur Jónasson.

„Það er ekki nein kona í aðalráðinu aðeins sem varamaður og það samræmist ekki reglum okkar, það eru reglur um kynjajafnrétti. Mér skilst að íslenska ráðið viti það fullvel að þeim beri skylda til að hafa konu með en stjórnmálaflokkarnir sjálfir hafi ekki náð samkomulagi um kvennefndarmann, “ segir mr. Hord, stjórnarformaður Evrópuráðsins í samtali við fréttastofu.

Karl Garðarsson, formaður Íslandsdeildarinnar, segir að það hafi aðeins verið vegna mistaka að kona fór ekki út á vegum nefndarinnar. Enginn af flokkunum þremur hafi tilnefnt konu sem aðalmann í forvali fyrir nefndina.

Hann segir jafnframt að til standi þó að breyta nefndinni fyrir næsta þing.  

Í fréttatilkynningu Evrópuráðsþingsins kemur fram að þingskapa- og stofnananefnd þingsins muni taka málið fyrir og taka lokaákvörðun á miðvikudag. Þangað til fá íslensku þingmennirnir eingöngu að taka sæti á þinginu til bráðabirgða, með málfrelsi og atkvæðisrétti.