Edward Snowden fór ekki til Kúbu í dag

Breiðþotan sem átti að flytja Snowden frá Rússlandi til Havana á Kúbu í morgun var þéttsetin blaðamönnum. Einn af þeim náði mynd af sæti Snowdens við flugtak.

Ekkert hefur spurst til uppljóstrarans í dag en líklegt þykir að hann muni sækja um hæli í Ekvador.

Síðustu vikur hefur heimsbyggðin fylgst með máli Snowdens eða eftir að hann lak upplýsingum um persónusnjósnir bandarískra og breskra yfirvalda á veraldarvefnum.

Málið þykir afar vandræðlegt fyrir yfirvöld í Bandaríkjunum. Snowden hefur verið ákærður fyrir fyrir njósnir, þjófnað og misnotkun opinberra eigna. John Kerry, utanríkisráðherra Bandaríkjanna, hefur lýst honum sem föðurlandssvikara.

Frá því að mál Snowdens komst í hámæli hefur hann verið undir verndarvæng upplýsingaveitunnar WikiLeaks. Kristinn Hrafnsson, talsmaður Wikileaks sagði um málið:

Hann er á öruggum stað og líður vel. Að öðru leyti er ég mjög hikandi og get ekki gefið upp nöfn og staðsetningar eða hans ferðaplön. Áskoranir til ríkja um að þau grípi til sambærilegra aðgerða og voru hér uppi á árum áður í fangaflugsprógrammi bandarísku leyniþjónustunnar. Þetta eru náttúrulega fáránleg viðbrögð og algjörlega á skjön við alþjóðasamninga sem veita mönnum þann rétt að sækja um pólitískt hæli," segir Kristinn.

Hann bætir svo við: „Ég get ekki upplýst um næstu skref. Staðan er viðkvæmt en engu að síður er hann búinn að koma á framfæri við diplómata í Moskvu frá Ekvador beiðni um pólitískt hæli. Að öðru leyti get ég lítið tjáð mig um stöðuna annað en það að hann er á öruggum stað og líður vel."