Fjölskylduhjálp neyðist til að hafa opið í allt sumar

„Það væri ábyrgðarleysi af okkar hálfu að loka. Fólk er búið að vera mjög áhyggjufullt yfir þessu og margir kvíða þessum vikum sem venjulega er lokað,“ segir Ásgerður Flosadóttir, forstöðumaður Fjölskyldhjálpar Íslands. Síðastliðin ár hefur verið lokað í fjölskylduhjálpinni yfir hásumarið en að sögn Ásgerðar gátu starfsmenn ekki hugsað sér að fara í sumarfrí í ár.

„Það væri alvarlegt mál ef fólk hefði ekki þann möguleika að sækja hjálp til okkar. Fólk hefur ekkert á milli handanna og við finnum fyrir því í sífellt auknum mæli,“ segir Ásgerður. Í fyrra úthlutaði Fjölskylduhjálp 40 þúsund matarpökkum. Ásgerður segist finna fyrir mikilli aukningu á þessu ári og sjálfboðaliðar hafa varla við. „Við höfum aldrei fundið fyrir svona miklu álagi hérna.“

Ásgerður segir að fólk sé í miklum vandræðum með að leysa út lyfin sín eftir að nýja lyfjafrumvarpið fór í gegn í byrjun maí, en með því voru gerðar umfangsmiklar breytingar á greiðsluþátttöku lyfjakostnaðar.

„Ég hef mikið fundið fyrir því að fólk þarf að velja á milli þess að kaupa sér mat og leysa út lyf. Við fengum svo margar beiðnir um styrki úr lyfjasjóði að hann tæmdist fljótlega eftir að nýja frumvarpið tók gildi.“

Ásgerður segir Íslendinga vera stolta þjóð og að fátæktin hér sé mjög falin. Hún sé þó svo sannarlega til staðar. „Fólk sem er á framfærslu sveitafélaganna hefur sama og ekkert á milli handanna og oft er átakalegt að horfa upp á fólk síðustu tíu daga mánaðarins. Það getur verið stingandi að vera í svona mikilli nánd við fátæktina,“ segir Ásgerður sem vill að fólk opni augun og geri sér grein fyrir vandanum. „Við verðum að hafa það að leiðarljósi að hjálpa þeim sem minna meiga sín.“

Mataraðstoð Fjölskylduhjálpar í sumar verður á miðvikudögum í Iðufelli 14 í Breiðholti og á fimmtudögum í Grófinni 10 í Reykjanesbæ.