Löng bið eftir meðferð við átröskunum

Í húsnæði Hvítabandsins við Skólavörðustíg, er að meðaltali 70 til 80 átröskunarsjúklingum sinnt á ári. Þegar hafa borist 67 beiðnir á þessu ári, sem þó er ekki hálfnað. Sigurlaug María Jónsdóttir, teymisstjóri og sálfræðingur í átröskunarteymi Hvítabandsins, segir að nú séu 27 mál á bið. „Við sinnum öllum beiðnum eins fljótt og við getum en biðlistinn eins og er, er þrír til fjórir mánuðir, það er bara þannig, á meðan hann var fjórar til sex vikur í fyrra,“ segir hún.

Spurð um skýringar segir Sigurlaug að opnað hafi verið fyrir möguleika á að sjúklingar leiti beint til teymisins auk þess sem nýjar verklagsreglur auðveldi fagfólki að greina átraskanir. Hún segir aukna bið geta haft slæm áhrif á sjúklingana. „Það tefur auðvitað meðferðina og að bati náist og við þurfum að forgangsraða málunum okkar núna. Við erum með mikið veika einstaklinga sem þurfa meiri vinnu og meðferð. Það hefur áhrif á þá sem eru minna veikir því þeir eru settir aftar á biðlistana okkar og það er þróun sem við höfum þurft að horfast í augu við í vetur.“

Soffía Dröfn Snæbjörnsdóttir var útskrifuð af Hvítabandinu nú í apríl. „Auðvitað er þetta virkilega erfitt og mikil átök en þetta eru snillingar þarna niðurfrá,“ segir Soffía um Hvítabandið. Hún segir sjúkdóminn mun alvarlegri en margir geri sér grein fyrir og tekur fram að gott væri að stækka deildina.

Sigurlaug telur ekki mögulegt að deildin stækki eins og er. „Nei, ég hef ekki heyrt neitt talað um það. Það vantar alls staðar peninga,“ segir Sigurlaug.