Merkel lofaði árangur Íslands

Angela Merkel, kanslari Þýskalands fór lofsamlegum orðum um endurreisn íslensks efnahagslífs á fundi med Ólafi Ragnari Grímssyni forseta Íslands í morgun. Merkel lýsti yfir áhuga á að sækja Ísland heim.

Fundur Ólafs Ragns og Merkel stóð í tæpan hálftíma og sat Gunnar Bragi Sveinsson, utanríkisráðherra, einnig fundinn. Merkel gaf ekki kost á viðtali, hvorki fyrir né eftir fundinn.

Ólafur Ragnar segir að fundurinn hafi verið mjög árangursríkur.

„Mestur tíminn fór í að ræða norðurslóðir og þessi verkefni sem blasa við þar. Hún lýsti því skýrt yfir að Þýskaland myndi beita sér með nýjum hætti gagnvart norðurslóðum og sæi mikla möguleika um samvinnu við Ísland á þessum sviðum, bæði hvað snertir vísindarannsóknir og viðskipti,“ sagði Ólafur Ragnar eftir fundinn.

Merkel bauð Sigmundi Davíð Gunnlaugssyni forsætisráðherra í heimsókn og lýsti ennfremur yfir áhuga á að sækja Ísland heim. Hún lofaði þann árangur sem náðst hefur í efnahagsmálum á Íslandi.

„Svo fór hún líka mjög lofsamlegum orðum endurreisn íslensks efnahagslífs og gerði sér skýra grein fyrir því hvað erfið sú glíma hefði verið, hún hefði þurft að fást við lönd í suður-Evrópu á undanförnum árum, þannig hún þyrfti engar kennslustundir í því hve fjármálakreppa af þessu tagi væri erfitt verkefni,“ sagði Ólafur Ragnar.

Töluðu þið eitthvað um Evrópusambandið, og aðildarumsókn Íslands?

„Við töluðum lítillega um það, og hún lýsti fullum skilningi yfir afstöðu nýrra stjórnvalda á Íslandi, og afstöðu íslensku þjóðarinnar. Hún sagði að Evrópusambandið ætti nóg með þau ríki sem væru nú þegar innan sambandsins og þau vandamál sem þar væri við að glíma. Hún hefði fullan skilning á því að Íslendingar vildu bíða og vildu fara aðrar leiðar, og að það væri ekkert vandamál gagnvart Þýskalandi með neinum hætti.“

Myndir frá fundinum í morgun, má sjá hér að ofan. Rut Sigurðardóttir ljósmyndari tók myndirnar.