Listamenn mótmæla menntamálaráðherra

Illugi Gunnarsson menntamálaráðherra leggur til í nýju stjórnarfrumvarpi um ríkisútvarpið að stjórn félagsins verði öll skipuð af Alþingi. Nokkur urgur er vegna málsins - Kolbrún Halldórsdóttir, forseti Bandalags íslenskra listamanna mun gera athugasemd við þessa afgreiðslu.

Með lögum sem sett voru í tíð fyrri ríkisstjórnar í mars á þessu ári, var gert ráð fyrir að menntamálaráðherra veldi formann stjórnar útvarpsráðs, starfsmenn Ríkisútvarpsins veldu einn áheyrnarfulltrúa en fimm fulltrúar væru skipaðir eftir tilnefningu sérstakrar valnefndar með fulltrúum ráðherrans, Alþingis, Bandalags íslenskra listamanna og samstarfsnefndar háskólastigs. Með frumvarpi Illuga er valnefndin hins vegar slegin af og allir stjórnarmenn kjörnir af Alþingi.

Pólitísk ábyrgð verður að vera

"Í raun og veru er ekki um neina stóra breytingu að ræða," segir Illugi. "Fyrirkomulagið hefur verið þannig að Alþingi hefur skipað þessa stjórn. Það stóð til að breyta því og það var gert með lögum nú í vor. En það hefur ekki komið enn til framkvæmda. Það sem ég er að gera með þessu er að ég vil að það verði áfram þannig að í þessa mikilvægu stofnun sé áfram skipað og ég tel það mikilvægt því ég tel að það eigi að vera beint samhengi milli þess hver tekur ákvörðun og hvert tekur ábyrgð. Það er að segja; ef fólk er óánægt með útvarpsráðið þá viti það nákvæmlega hverjir það eru sem skipa það og geti með atkvæði sínu sagt raunverulega skoðun sína á því."

Þar er Illugi að vísa til hinnar pólitísku ábyrgðar. "Mér finnst eðlilegt að Alþingi sjálft standi að þessari skipan fremur en einhver valnefnd. Menn eiga að geta sagt við þingmennina: Ég er ósáttur við þitt val. Ég ætla ekki að kjósa þig, ef ég er óánægður."

"Fellum okkur ekki við þetta"

Kolbrún Halldórsdóttir, forseti Bandalags íslenskra listamanna, er afar ósátt við hina breyttu tilhögun en starfsmenn RÚV voru búnir að kjósa sinn áheyrnarfulltrúa í stjórn, samstarfsnefnd háskólastigs var búin að ganga frá sínum fulltrúa og sjálf hafði hún verið kjörin í valnefnd. Henni hugnast engan veginn þetta breytta fyrirkomulag.

"Mér finnst við vera að fara á mis við þetta tækifæri sem nýju lögin gáfu okkur. Þar sem búið var til svona millistig milli stjórnarinnar og hins pólitíska valds. Þá með því að BÍL, og samstarfsnefnd háskólastigsins áttu að fá tækifæri til að taka þátt í að velja menn inn í valnefndina ásamt alþjóðanefnd þingsins. Núna ætla menn að fara bara aftur í þetta gamla far, sem hefur verið krítiserað í áratugi, að láta hið pólitíska vald velja beint sjö manna stjórn sem þýðir að það er hætta á pólitískum áhrifum inn í innsta hring stjórnunar Ríkisútvarpsins. Það fellum við okkur ekki við þegar við áttum tækifæri til að gera annað. BÍL mun að sjálfsögðu gera athugasemdir við þetta," segir Kolbrún Halldórsdóttir.