Hemmi verður jarðsunginn frá Hallgrímskirkju

„Við áttum okkur á því að Hemmi Gunn var sameign þjóðarinnar. Ljósberi og mannvinur," segir Sigrún Hermannsdóttir, dóttir hins ástsæla Hermanns Gunnarssonar sem varð bráðkvaddur í Tælandi 4. júní.

Útförin verður ekki í beinni útsendingu, eins og nefnt var sem hugmynd fljótlega eftir að fréttist af andláti Hemma, né gerð frá Hlíðarenda, en sjónvarpsvélar verða leyfðar við athöfnina. Gert verður ráð fyrir því að mikill fjöldi muni vilja fylgja Hermanni Gunnarssyni til grafar og verður skjám og hljóðkerfi komið fyrir við kirkjuna. Vonir standa til að almættið verði með í liði og sjái til þess að veður verði skaplegt. Gera má ráð fyrir miklum mannfjölda á Skólavörðuholtinu, sem votta vill Hemma virðingu sína en hann var með eindæmum vinsæll og vinamargur maður.

Gríðarlegt umstang fylgir því að koma líki til landsins, ekki síst frá Tælandi og hefur því fylgt mikil pappírsvinna auk óvissu um hvenær kistan kemur til landsins. Þetta hefur sett afkomendur Hemma í nokkurn vanda við skipulagningu jarðarfararinnar, til dæmis er varðar allar tímasetningar. Stefnt er að því að jarðarförin fari fram í lok mánaðarins.

Hins vegar hafa ættingjarnir ákveðið ýmislegt er varðar sjálfa athöfnina. Einn helsti vinur Hemma, Egill Eðvarðsson framleiðandi, mun stjórna athöfninni; velja tónlistaratriði og fleira í þeim dúr en séra Pálmi Matthíasson, einnig mikill vinur hins látna, mun jarðsyngja. Útförin fer fram frá Hallgrímskirkju.

„Við viljum leyfa fólki að fylgjast með," segir Sigrún. Hún segir að þau börnin séu afskaplega þakklát fyrir þann mikla hlýhug sem þau hafa fundið í kjölfar fráfallsins og auðsýnda samúð. Það hefur reynst mikill stuðningur. Þau vilja koma sérstaklega á framfæri þökkum fyrir það. Því hefur verið ákveðið að sjónvarpsmyndavélar verði leyfðar við sjálfa athöfnina þó hún verði ekki í beinni útsendingu.

Sérstakur viðauki verður við fréttatíma Ríkissjónvarpsins á jarðarfarardag, auk þess sem þá um kvöldið verður á dagskrá sérstakur minningarþáttur, sem Egill hefur umsjá með.