Svavar Halldórsson kærir íslenska ríkið

Svavar Halldórsson, fyrrverandi fréttamaður, og Ríkisútvarpið hafa kært úrskurð Hæstaréttar, sem féll í nóvember síðastliðnum, til Mannréttindadómstóls Evrópu. Þetta kemur fram í tilkynningu frá RÚV.

Málið snýr að frétt sem Svavar gerði á RÚV í desember árið 2010. Jón Ásgeir Jóhannesson athafnamaður kærði Svavar fyrir meiðyrði og vann málið fyrir Hæstarétti 15. nóvember. Þar var Svavar dæmdur til að greiða Jóni Ásgeiri 300 þúsund krónur í miskabætur og eina milljón í málskostnað.

Í tilkynningunni frá RÚV er haft eftir Páli Magnússyni útvarpsstjóra að aðkoma RÚV að málinu helgist af því að í húfi séu ákveðin grundvallaratriði í frjálsri frétta- og blaðamennsku sem reyna verði á til þrautar hvort gildi ekki á Íslandi eins og í öðrum löndum sem búa við frjálsa fjölmiðla. Ríkisútvarpinu sé skylt að standa vörð um þessi grundvallaratriði.

„Í kæru til Mannréttindadómstólsins er byggt á því að niðurstaða Hæstaréttar feli í sér takmörkun á tjáningarfrelsi Svavars sem brjóti í bága við 10. gr. MSE, nánar tiltekið að um sé að ræða takmörkun sem sé ekki nauðsynleg í lýðræðisþjóðfélagi. Byggt er á því að umrædd frétt hafi varðað þjóðfélagslega mikilvægt málefni, varðað persónu sem hafi verið áberandi í íslensku þjóðlífi um langt skeið og að í niðurstöðu Hæstaréttar hafi ekki verið tekið nægt tillit til hins mikilvæga hlutverks fjölmiðla í lýðræðislegu þjóðfélagi.

Þá er byggt á því að gerðar hafi verið óhæfilega miklar kröfur til Svavars í niðurstöðu Hæstaréttar um sönnun á ummælunum og ekki tekið tillit til þess að hann hafi verið í góðri trú við undirbúning fréttarinnar og hafi starfað í samræmi við viðurkennda hætti í blaðamennsku. Þá er vísað til þess að Hæstiréttur hafi ekki tekið tillit til sönnunargagna sem lögð voru fram við meðferð málsins fyrir dómstólum og sýna að mati Svavars fram á sannleiksgildi ummælanna.

Með hliðsjón af framangreindu og aðstæðum öllum er byggt á því að niðurstaða Hæstaréttar þann 15. nóvember 2012 sé ekki í samræmi við nýlega dómaframkvæmd Mannréttindadómstólsins í málum er varða 10. gr. sáttmálans um tjáningarfrelsi. Ber þar helst að nefna tvo dóma réttarins frá því 10. júlí 2012 í málum tveggja íslenskra blaðamanna,“ segir í tilkynningunni.