Milljónasparnaður í fækkun endurkomu fanga

Nærri því helmingur allra fanga sem eru í afplánun í dag hafa mátt dúsa í fangelsi áður. Beinn kostnaður við hvern fanga er um níu milljónir króna á ári. Það er því til mikils að vinna fyrir samfélagið að fækka endurkomu fanga, segir fangelsismálastjóri.

Í dag eru 169 fangar að taka út sína afplánun á Íslandi í dag. 72 af þeim hafa að minnsta kosti einu sinni setið inni sem gera um 43 prósent. Þessi var 50 prósent á sama tíma í fyrra. 48 prósent fyrir tveimur árum og 46 prósent 2010.

Áætlað er að beinn kostnaður við hvern fanga sé um 25 þúsund krónur á dag, um 9 milljónir á ári.

"Ef allt er reiknað, rannsókn lögreglu, kostnaður dómstóla og tjónið sem hlýst af fyrir brotaþola þá er þetta auðvitað mikið hærri tala," segir Páll Winkel, fangelsismálastjóri.

Hér á landi stendur nú yfir alþjóðleg ráðstefna þar sem meginþemað er hvernig best sé að fækka endurkomum fanga í fangelsi. Þar er einna helst horft til menntunar sem öflugan áhrifaval í þeim efnum.

Að mati Páls er ekki nokkur spurning að svo sé.

"Maður veit að sjálfsöryggið eykst, menn eiga auðveldara með fá vinnu og hugsanlega fara í nýjan félagsskap. Þannig að þetta skiptir að sjálfsögðu miklu máli. Við getum valið að gera þetta svona eða gert þetta eins og sumir vilja, að loka menn inn og gera ekki neitt eins og gert er í Bandaríkjunum. Þar eru líka 1000 fangar á hverja 100 þúsund íbúa en hér eru þeir 50. Þannig að við erum að gera hlutina rétt hér."

En það er eitt að fækka endurkomum fanga. Hvernig gengur að fækka nýliðum?

"Það er ekki eins einfalt verk enda eru þeir ekki komnir í okkar hendur. En þetta gengur ágætlega þrátt fyrir að við séum með langa biðlista," sagði Páll.