Beckham ekki með PSG á morgun - ferillinn búinn

David Beckham var ekki valinn í 19 manna leikmannahóp franska liðsins Paris St Germain sem mætir Lorient á morgun í lokaumferð frönsku deildarinnar. Það þýðir að Beckham hefur spilað sinn síðasta leik á ferlinum.

Beckham var fyrirliði PSG um síðustu helgi og lagði þá upp eitt marka liðsins í 3-1 sigri á Brest. Beckham sem er orðinn 38 ára gamall tilkynnti það í aðdraganda þess leiks að hann ætlaði að leggja skóna á hilluna eftir tímabilið.

Beckham fékk heiðursskiptingu á 81. mínútu leiksins um síðustu helgi og fékk þá eftirminnilegar viðtökur hjá troðfullum Parc des Princes. það var því búist við því að hann yrði ekki með á morgun.

David Beckham lék tíu deildarleiki með Paris St Germain á þessu tímabili og  hjálpaði liðinu að vinna meistaratitilinn. Það var tíundi meistaratitilinn á ferli Beckham sem varð meistari í fjórum löndum.