Unnið að því í nokkur ár að efla lagaumhverfið í kringum stóriðju

Katrín Júlíusdóttir fjármála- og efnhagsráðherra segir ráðuneytið hafa unnið núna í nokkur ár að því að betrumbæta lagaumhverfið í kringum stóriðjur og stórfyrirtæki, en í Kastljósi í gærkvöldi var fullyrt að Alcoa og Norðurál borga litla sem enga tekjuskatta hér á landi, þar sem þau skulda systurfélögum sínum erlendis hundruð milljarða króna.

Fyrirkomulagið er alþekkt erlendis, en lög hér á landi gera þessa aðferð við að lækka skatta auðveldari.

Alþjóðgjaldeyrissjóðurinn benti stjórnvöldum á þessa brotalöm samkvæmt Kastljósi en að sögn Katrínar hefur starfshópur, sem meðal annars aðilar vinnumarkaðarins og fjármálaráðuneytisins eiga sæti í, unnið að því að skila tillögum um það hvernig megi meðal annars taka á reglum varðandi þunna eiginfjármögnun í allnokkurn tíma.

Hópurinn hefur þegar skilað tillögum, hann mun svo aftur skila tillögum skömmu eftir páska og að lokaniðurstöðum í september gangi allt eftir að sögn Katrínar.

Katrín leggur hinsvegar töluverða áherslu á að ástæðan fyrir því að lög um þetta hafi ekki verið lögð fram strax síðasta haust var til þess að tryggja að lögin næðu ekki aðeins til lánaviðskipta eins og lýst er í Kastljósinu, heldur einnig verðlagningu vara sem eru seldar á milli fyrirtækja í eigu sömu aðila. Eða milliverðlagningu eins og það er kallað.

Þannig er tölvufyrirtækið Microsoft meðal annars þekkt fyrir að selja vörur á milli fyrirtækja í eigin eigu langt undir markaðsvirði. Skýrasta dæmið um þetta er stærsta skattalagamál sem hefur komið upp í Danmörku þar sem dönsk skattayfirvöld telja að Microsoft skuldi rúmlega 130 milljarða í skatta. Ástæðan voru kaup Microsoft á tölvufyrirtækinu Navision.

Ríkisstjórnin hefur skattlagt orkuiðjuna hér á landi. Árið 2009 var settur á sérstakur raforkuskattur með samkomulagi við orkufrekan iðnað. Hann hefur skilað um tveimur milljörðum króna árlega í ríkissjóð, en rann sitt skeið á enda í lok síðasta árs.

„Þetta er áhyggjuefni, og þess vegna þarf að vinna í þessu," segir Katrín en hún segir að hugsanlega sé einnig grundvöllur í skattalögum til þess að skoða lánaviðskiptin eins og Kastljós greindi frá, og athuga hvort grípa þurfi þar inní.

„Það þarf allavega að skoða þetta betur," segir Katrín sem telur nægilega mikla samstöðu um málið innan þingsins til þess að regluverkið verið styrkt til muna næsta kjörtímabil, hverjir sem fari þá með völdin.

Viðbót kl 17:30

Rétt er að taka fram að forsvarsmenn Norðuráls hafna alfarið þeirri fullyrðingu að fyrirtækið borgi nánast enga skatta. Benda þeir á að á síðasta ári hafi Norðurál  á Grundartanga greitt hæstu opinber gjöld allra lögaðila, fyrir utan ríki og banka. Þar af var tekjuskattur 1.534 milljónir.  Árið 2011 hafi tekjuskatturinn numið 1.282 milljónum. Til viðbótar hafi Norðurál greitt um 1.200 milljónir í fyrirframgreiddan tekjuskatt. Samtals sé því greiddur tekjuskattur síðustu 4 ár um 4.500 milljónir.