Appleton lifði af tíu dögum lengur en Berg

Michael Appleton hefur verið sagt upp störfum sem knattspyrnustjór Blackburn Rovers. Langavitleysa heldur áfram á Ewood Park.

Appleton tók við liðinu af Henning Berg í janúar. Norðmanninum var sagt upp störfum eftir aðeins 57 daga í starfi. Starfsdagar Appleton voru tíu fleiri eða 67.

Blackburn gerði 1-1 jafntefli við Burnley í grannaslag í ensku b-deildinni um helgina. Í síðustu viku féll liðið út úr FA-bikarnum gegn Millwall.

Appleton stýrði Blackburn í 15 leikjum. Fjórir þeirra unnust en sex töpuðust. Liðið situr í 18. sæti deildarinnar, fjórum stigum frá fallsæti, en liðið hefur ekki unnið í síðustu átta leikjum.

Appleton hafði aðeins stýrt Blackpool í 65 daga þegar hann tók við liði Blackburn.