Gascoigne er í lífshættu

Umboðsmaður fyrrum knattspyrnumannsins Paul Gascoigne segir að líf hans sé í hættu eftir að hann byrjaði að drekka aftur.

Gascoigne steig á svið á góðgerðarsamkomu á fimmtudagskvöldið. Hann var drukkinn og brotnaði niður á sviðinu, áður en hann var leiddur í burtu.

Hann hefur áður talað opinskátt um baráttu sína við áfengissýkina en árið 2008 gripu yfirvöld í taumana og skikkuðu hann í meðferð.

„Hann verður ekki þakklátur mér fyrir að segja þetta en hann þarf umsvifalaust á hjálp að halda," sagði umboðsmaðurinn Terry Baker við BBC.

„Ég veit ekki hvað hefur komið fyrir síðan ég hitti hann fyrir jól. Þá var hann í góðu lagi. En hann er ekki í lagi núna og ég held að hann viti það sjálfur."

„Líf hans er alltaf í hættu því hann er áfengissjúklingur. Kannski getur enginn bjargað honum - ég veit það ekki. Ég veit það hreinlega ekki."

Baker hefur starfað með Gascoigne síðustu tvö ár og aldrei séð hann drekka fyrr en nú. „Við höfum miklar áhyggjur af honum."