Velferðarráðuneytið birtir ályktanir hagsmunasamtaka

Velferðarráðuneytið sendi fréttatilkynningu á fjölmiðla í gær þar sem vakin var athygli á ályktun frá hagsmunasamtökunum Landssambandi eldri borgara (LEB). Þá má einnig finna frétt á vef ráðuneytisins þar sem vakin er sérstök athygli á ályktuninni.

Margrét Erlendsdóttir, upplýsingafulltrúi ráðuneytisins segir ráðuneytið reglulega birta aðsent efni frá hagsmunasamtökum. „Það held ég að gerist alltaf reglulega."

Aðspurð hvaða sjónarmið gilda um hvaða hagsmunasamtök geta fengið brautargengi á heimasíðu ráðuneytisins segir Margrét: „Ef að það kæmi hér ályktun frá einhverjum sem mæltu gegn þessu frumvarpi þá held ég að það væri fullkomlega eðlilegt og sjálfsagt að birta hana líka."

Margrét vildi ekki tjá sig um hvort birtingin væri sama eðlis og ef LÍÚ fengi ályktanir sínar birtar á vef sjávarútvegsráðuneytisins. „Ég skal ekki segja um það," segir Margrét.

Ekki stundað í atvinnuvega- og nýsköpunarráðuneytinu

Þórir Hrafnsson, upplýsingafulltrúi í atvinnuvega- og nýsköpunarráðuneytinu segir hagsmunasamtök ekki fá birtingar á vefsíðu ráðuneytisins. „Við höfum ekki praktiserað þetta, þetta hefur aldrei verið rætt."

Hann segir það vandrataðan veg hvað ráðuneytið sjálft geti birt með þessum hætti. „Ef maður byrjar á þessu, þá verður væntanlega að setja einhverjar reglur um þetta. Þá held ég að við gerðum ekkert annað á okkar heimasíðu en að birta ályktanir."

Óheppilegt ef hvaða samtök sem er geta fengið birtingu

Jóna Valgerður Kristjánsdóttir, formaður LEB segist hafa vitað um að ályktunin yrði líkast til birt á vef ráðuneytisins. „Já við vorum búin að afhenda þeim ályktunina. Ráðherra var tilkynnt um að henni væri heimilt að nýta hana."

Jóna segist ekki muna til þess að ályktanir félagsins hafi áður verið birtar á vef ráðuneytanna. Hún segir LEB þó alltaf hafa greiðan aðgang að ráðuneytinu „eftir því sem við höfum beðið um."

Hún segir aðspurð óheppilegt ef hvaða hagsmunasamtök sem er geta fengið ályktanir sínar birtar á vef ráðuneytanna, en ráðuneytin hljóti að stjórna því hvaða samtök eigi innangengt.