Vilja skikka dómara til að nota Barnahús

Nefnd á vegum Alþingis vill skoða hvort auka megi heimildir lögreglu til að nota tálbeitur við störf sín. Til skoðunar er að skikka dómara til að nýta sér þjónustu Barnahúss við skýrslutöku á börnum. Leggur til að lögreglan fái aukafjárveitingu.

Undirnefnd á vegum allsherjar- og menntamálanefndar Alþingis um kynferðisbrot gegn börnum vill að metið verði hvort auka megi heimildir lögreglu til að forða börnum frá kynferðisofbeldi og hafa uppi á kynferðisbrotamönnum. Þá yrði lagt mat á kosti þess og galla að auka heimildir lögreglu til að nota tálbeitur við störf sín til að ná til þeirra sem gerst hafa sekir um kynferðisbrot eða eru grunaðir um slíkan verknað. Þetta var meðal þess er kom fram á blaðamannafundi nefndarinnar í gær.

Nefndin vill að metið verði í samstarfi við sveitarfélögin hvort æskilegt sé að stofna gagnagrunn með upplýsingum um dæmda kynferðisbrotamenn sem yrði aðgengilegur fyrir vinnuveitendur sem ráða fólk til starfa með börnum og ungmennum. Einnig leggur nefndin til að fjárveitingar til rannsóknardeilda lögreglunnar um allt land og embættis ríkissaksóknara verði auknar meðal annars vegna mikillar fjölgunar kynferðisafbrotamála sem tilkynnt hafa verið til lögreglunnar.

Lögð er áhersla á mikilvægi Barnahúss og vill nefndin að Barnahús verði eflt með auknum fjárveitingum. Vill nefndin hvetja dómara til að nýta sér þjónustu Barnahúss án þess að hlutast til um sjálfstæði þeirra, en athygli vekur að dómarar nota þjónustuna mismikið eftir landshlutum. Dómarar við Héraðsdóm Reykjavíkur nýta þjónustu Barnahúss minnst. Til greina komi að skikka dómara til að nota Barnahús í slíkum málum. Að sögn Skúla Helgasonar er frumvarp þess efnis til skoðunar í innanríkisráðuneytinu.

Um fjórföld aukning hefur orðið á málum sem tilkynnt voru lögreglu og tengjast kynferðisbrotum gegn börnum á fyrstu mánuðum ársins. Samkvæmt bráðabirgðatölum úr málaskrá lögreglu voru 42 slík mál tilkynnt í janúar 2013 miðað við um tíu mál að meðaltali í hverjum mánuði á árunum 2007 til 2012.

Í nefndinni sitja Skúli Helgason, Þorgerður Katrín Gunnarsdóttir, Siv Friðleifsdóttir og Þuríður Backman og er hlutverk hennar að vinna að tillögum til úrbóta varðandi meðferð kynferðisbrotamála gegn börnum.