Þormóður um andstæðinginn: Er hvergi banginn

Þormóður Jónsson mun etja kappi við þriðja besta júdókappa heims í sínum þyngdarflokki þegar keppni hefst hér á Ólympíuleikunum í London.

Dregið var í gær og drógst Þormóður gegn Rafael Silva frá Brasilíu en hann er Ameríkumeistari í 100+ kg flokki og í þriðja sæti heimslistans.

„Mín viðbrögð við þessu voru bara góð. Þetta hefði getað verið verra. Þetta er bara verkefni og ætla ég að taka á því. Svona eru Ólympíuleikarnir - það eru allir mjög sterkir hér."

Þormóður og þjálfari hans munu nú búa til keppnisáætlun en það er ljóst að það verður við ramman reip að draga.

„Hann er mjög sterkur en ég hef glímt við hann áður. Og ég er hvergi banginn. Ég er „underdog" en það verður einhver að vera í því hlutverki."

„Ég er búinn að vera að hugsa um Teddy Riner (efsta mann heimslistans og margfaldan heimsmeistara) alla vikuna og vildi sleppa við hann. Ég vildi heldur ekki mæta Daiki (Kimikawa) og er feginn að hafa sloppið við þá."

„Ég veit að þetta verður erfitt en ég mun gefa mig allan í þetta. Þetta verður þá bara léttara í næstu umferð."

Keppt verður í flokki Þormóðs þann 3. ágúst næstkomandi.