Launahærri hjá SAG

Hanna Guðrún Halldórsdóttir leikkona stundar iðn sína í Los Angeles og fer með lítið hlutverk í sjónvarpsþáttunum The Newsroom sem sýndir verða á Stöð 2 í haust.

Hanna Guðrún flutti til Bandaríkjanna árið 2007 og útskrifaðist með BA gráðu í leiklist og fjölmiðlafræði í desember. Hún segist hafa upplifað margt skemmtilegt eftir flutningana til Los Angeles og fengið að spreyta sig á ólíkum hlutverkum í kvikmyndum sem og sjónvarpi. Fyrsta hlutverk hennar var í kennslumyndbandi um hvernig bregðast ætti við náttúruhamförum en hlutverkin hafa orðið kræsilegri með árunum og fer Hanna Guðrún til dæmis með lítið hlutverk í sjónvarpsþáttunum The Newsroom sem sýndir verða á Stöð 2 í haust.

Hanna Guðrún gerðist einnig nýverið félagi í hinu nýstofnaða SAG-AFTRA, en það er stéttarfélag sem stofnað var í mars þegar hin sögufrægu félög Screen Actors Guild og American Federation of Television and Radio Artists sameinuðust í eitt. Félögin voru bæði stofnuð á fjórða áratug síðustu aldar og var ætlað að standa vörð um hagsmuni leikara og annarra sem störfuðu innan kvikmynda- og fjölmiðlageirans á kreppuárunum.

"Ég gerðist meðlimur AFTRA fyrir tveimur árum síðan, en varð meðlimur að SAG rétt áður en félögin sameinuðust. Hið nýja SAG-AFTRA er lokað félag og meðlimir þess mega ekki vinna í verkefnum þeirra sem ekki eru með samning við SAG eða AFTRA, eins og auglýsingum. Laun félagsmanna eru betri en um leið ertu að keppa um hlutverk við marga reyndari leikara," útskýrir hún.

Þegar hún er að lokum innt eftir því hvort hún rekist oft á þekkt andlit í tengslum við vinnu sína svarar Hanna Guðrún játandi. "Auðvitað sér maður oft frægt fólk hérna. En oftast er maður bara að sinna sínu starfi og ekki að pæla mikið í því. Ég viðurkenni samt að ég hef alveg orðið smá "starstruck" stundum. Hjartað sló til dæmis aðeins örar þegar sjálfur McDreamy heilsaði mér hjá vatnskælinum á tökustað eitt sinn," segir hún að lokum.

sara@frettabladid.is