Blús læknar öll vandamál

John Primer spilar á Blúshátíð í Reykjavík um páskana. Hann spilaði með goðsögninni Muddy Waters á sínum yngri árum. Bandaríski blústónlistarmaðurinn John Primer spilar á Blúshátíð í Reykjavík um páskana. Hann hlakkar til að koma til landsins og ætlar að dvelja hér í fjóra daga. „Þetta verður gaman,“ segir Primer, sem spilar með The Blue Ice Band á Hótel Nordica 4. apríl.

Primer fæddist í Mississippi 1945 en fluttist til Chicago 1963 og spilar því hinn svokallaða Chicago blús. Hann hóf feril sinn í hljómsveitinni The Maintainers sem blandaði saman sálar- og blústónlist. Primer kynntist Sammy Lawhorn sem hafði spilað með goðsögninni Muddy Waters og fékk þar góða leiðsögn. Þegar annar þekktur blúsari, Willie Dixon, safnaði mönnum saman í All Stars-hljómsveit árið 1979 réð hann Primer sem gítarleikara. Árið eftir fékk Muddy Waters Primer til að spila í hljómsveit sinni og þar lék hann þar til Waters lést árið 1983. „Það var frábært að spila með Muddy. Það var einn skemmtilegasti tími ævi minnar. Þeir verða ekki stærri en hann,“ segir Primer með sterkum Mississippi-hreim. „Þetta var mjög gott tækifæri fyrir mig og mikil reynsla. Muddy var frábær náungi.“

Primer gekk næst til liðs við Magic Slim og hljómsveit hans Teardroppers. Samstarfið entist í rúman áratug og að því loknu ákvað Primer að einbeita sér að sólóferli sínum og fór að gefa út eigin plötur. Hann er einmitt að taka upp nýja plötu um þessar mundir en ætlar ekki að spila efni af henni í Reykjavík, heldur einbeita sér að eldra efni. Primer var tilnefndur til Grammy-verðlaunanna árið 2009 ásamt fleiri blúsurum fyrir tvöföldu plötuna Chicago Blues: A Living History. Árið eftir var hann tilnefndur í fjórgang til bandarísku blúsverðlaunanna en tókst ekki að bera sigur úr býtum. Í ár hefur hann einnig verið tilnefndur til sömu verðlauna en þau verða afhent í maí. Aðspurður hvaða þýðingu þessar tilnefningar hafa fyrir hann segir Primer: „Þær þýða það að maður verður bara að halda áfram að spila blúsinn og ekki hætta fyrr en maður hefur unnið einhver verðlaun,“ segir hann og hlær. „Bara halda áfram og gefast ekki upp.“

En hvað er það við blúsinn sem er svona heillandi? „Blús er tilfinning sem lætur mér líða vel. Hann er hluti af mínu lífi og læknar öll mín vandamál.“

freyr@frettabladid.is