Eygló Ósk: „Dó í bringusundinu“

Eygló Ósk Gústafsdóttir var ekki ánægð með niðurstöðuna í 200 m fjórsundi á Ólympíuleikunum í dag en hún var langt frá sínu besta.

Eftir góða byrjun í fyrri 100 metrunum, sérstaklega baksundssprettinum, átti hún mjög erfitt uppdráttar í bringusundinu. Hún náði ekki að vinna það upp á lokasprettinum sem var í skriðsundi.

Hún kom í mark á 2:16,81 mínútum sem er tæpum tveimur sekúndum frá Íslandsmeti hennar.

„Ég er ekki ánægð. Ég ætlaði að fara miklu hraðar," sagði Eygló. „Mér leið mjög vel í baksundinu en svo kom bringusundið sem er mín lélegasta grein. Ég bara dó í henni og komst ekkert áfram."

„Ég reyndi svo bara mitt besta í skriðsundinu. Ég sá að allar stelpurnar voru farnar fram úr mér og ég reyndi að sprengja mig eins og ég gat. En það tókst ekki."

Eygló segir að það hafi verið erfitt að keppa tvo daga í röð en hún keppti í 100 m baksundi í gær. „Ég er nú vön því en það er samt erfitt. Nú fæ ég tveggja daga hvíld fyrir 200 m baksundið og ætla ég að leggja allt mitt í það sund."

Eygló hefur nú synt í tveimur greinum - 100 m baksundi og 200 m fjórsundi. Hún hefur því nú þegar tvisvar keppt í baksundi á leikunum en aðalgrein hennar er 200 m baksund.

„Mér líður vel í baksundinu og ég á nú eftir að sjá hvaða tíma ég fékk í þeim spretti í dag. En laugin er þægileg og mér líður vel í henni."

„Þetta eru auðvitað vonbrigði en um leið mjög skemmtilegt. Það skiptir líka máli að hafa gaman að þessari reynslu."