Tókst að kortleggja tilhugalíf hvítra hákarla

Vísindamönnum hefur tekist að kortleggja tilhugalíf hvítra hákarla og þar með skilja betur hvernig þetta hættulegasta rándýr heimsins hegðar sér.

Fjallað er um málið í nýlegu hefti af tímaritinu Nature. Þar segir að aldrei áður hafi tekist að fylgjast með tilhugalífi hvítra hákarla.

Vísindamönnum í Kaliforníu tókst fyrir nokkru síðan að setja merki á 53 slíka hákarla og fylgjast þannig með þeim í gegnum gervihnetti. Í ljós kom að einu sinni á ári safnast þeir saman á hafsvæði í austanverðu Kyrrahafi.

Þar taka þeir, það er bæði kynin, að synda niður á allt að 500 metra dýpi í sífellu. Kvendýrin þó sýnu grynnra en karldýrin.

Þessar dýfur eru ekki í neinu samhengi við fæðuöflun því engin bráð er til staðar fyrir hákarlana á þessum slóðum.

Vísindamennirnir telja að með þessum dýfum séu karldýrin að sýna hinu kyninu í hve frábæru formi þeir séu og því góðir til undaneldis.

Eitt er þó víst. Tilhugalífið er mjög ofbeldisfullt og kvendýrin eru fljót að yfirgefa svæðið, yfirleitt með bitsár á skrokknum.