Látið hana í friði

Leikkonan Jodie Foster er búin að fá sig fullsadda af allri neikvæðri fjölmiðlaumfjöllun um vinkonu sína Kristen Stewart sem hélt við manninn sem leikstýrði kvikmyndinni Snow White And The Huntsman. Jodie hefur nú stigið fram og biður fjölmiðla að láta leikkonuna sem er aðeins 22 ára í friði.

"Hyllið þessi ungmenni frekar en að brjóta þau niður. Þau eru nákvæmlega eins og þið. Ég hef sagt það áður og segi það aftur: Ef ég væri ung að hefja leikferilinn í dag myndi ég hætta áður en ég byrjaði," segir Jodie og blótar fjölmiðlunum sem fylgja leikurunum hvert spor þannig að þau eru ekki fær um að anda án þess að fjallað sé um það.

"Ég vann með Kristen árið 2011 í fimm heila mánuði þegar við unnum við tökur á kvikmyndinni Panic Room. Tökustaðurinn var á við skáp þannig að við urðum mjög nánar enda töluðum við mikið saman og hlógum svo klukkutímum skipti og ég fór að elska þessa stúlku", sagði Jodie þegar hún lýsti vináttu þeirra og hvernig hún hófst.

Þá ræðir Jodie einnig um móður Kristen sem hún fékk að kynnast við tökurnar og að hún hafi reynt að sannfæra mömmuna um að láta stelpuna finna sér annað starf en móðir Kristen sagðist hafa reynt það en ekki gengið sem skyldi því dóttir hennar elskar að leika og hefur alltaf ætlað sér að verða leikkona.