Fjölmiðlabanni í ofbeldismáli aflétt

„Slagsmálin stóðu yfir í tvær eða þrjár mínútur. Þetta var svakalegt. Algjör óreiða. Þú getur rétt ímyndað þér hvernig þetta var. Stofan var ekki meira en fimmtán fermetrar og það voru tíu eða tólf manns að slást."

Þetta er á meðal þess sem kom fram í vitnisburði Annþórs Karlssonar þegar aðalmeðferð í máli ákæruvaldsins gegn honum og Berki Birgissyni hófst í gær.

Við upphaf málsmeðferðar í Héraðsdómi Reykjaness fór saksóknari fram á að fréttaflutningur af skýrslutökum sakborninga, brotaþola og vitni, yrði takmarkaður. Fjölskipaður héraðsdómur féllst á þetta. Nú hafa allir hagsmunaaðilar gefið skýrslu og fjölmiðlabanni verið aflétt.

Málið snýst um nokkrar sérstaklega hættulegar líkamsárásir sem áttu sér stað í heimahúsi í Mosfellsbæ og Reykjavík árin 2011 og 2012. Þá er Annþóri einnig gefið að sök að hafa gengið í skrokk á þremur mönnum á sólbaðsstofunni Sól í Hafnarfirði í október árið 2011.

Fyrsti ákæruliður tekur til stórfelldrar líkamsárásar sem átti sér stað 4. janúar árið 2012 í Mosfellsbæ. Annþóri og Berki er gefið að sök að hafa ráðist inn á heimili Bergs Más Ágústssonar en þar voru þrír aðrir fyrir. Í ákæruskjali kemur fram að hópurinn hafi ráðist á mennina með sleggju, golfkylfum og öðrum bareflum.

Verjendur Annþórs og Barkar sóttust eftir því að færa sönnur á að skjólstæðingar sínir hafi verið í íbúðinni til að til að ræða við húsráðanda, Berg Má, um minniháttar skuld (50 þúsund krónur) og að vera þeirra þar hafi ekki verið í neinum tengslum við það sem gerðist á eftir.

Fyrr um kvöldið hafði Bergur Már, ásamt nokkrum öðrum brotaþolum, bankað upp á hjá aðilum sem ákærðir eru. Til átaka hafi komið milli þeirra. Fram kom í skýrslutökum sakborninga að þeir hafi farið seinna um kvöldið í Mosfellsbæ til að innheimta skuld vegna árásarinnar. „Eins og venja er að gera þegar slíkt hefur komið upp á" að mati Annþórs.

Þá er Annþóri og Berki gefið að sök að hafa skipulagt árásina á meðan þeir ræddu við Berg Má og aðra brotaþola. Hann hafi síðan hringt í þá sakborninga sem biður fyrir utan húsið og hleypt þeim inn í íbúðina.

Sakborningar og brotaþolar voru á einu máli um að slagsmálin hafi byrjað um leið og hópurinn kom inn í íbúðina.

Eins og áður segir hafa sakborningar, brotaþolar og önnur vitni gefið skýrslu. Ítarlega verður greint frá vitnaleiðslum aðalmeðferðarinnar hér á vísi í kvöld.