Mourinho: Ánægður með viðhorf leikmanna

Jose Mourinho, stjóri Real Madrid, hefur tekið gleði sína á ný eftir frábæran 3-2 sigur liðsins á Manchester City í Meistaradeild Evrópu í kvöld.

Mourinho var óvæginn í garð leikmanna sinna eftir að Real tapaði fyrir Sevilla í spænsku úrvalsdeildinni um helgina.

„Þetta var gott vegna þess að liðið mitt hefur endurheimt kjarnann sinn. Leikmenn sönnuðu fyrir mér að þeir geta hagað sér eins og fagmenn og borið virðingu fyrir sögu Real Madrid," sagði Mourinho eftir leikinn í kvöld.

„Ég er mjög ánægður með viðhorf leikmannanna. Þetta var stór sigur á stóru liði. Ég vorkenni ekki City - svona er fótboltinn. Við áttum skilið að vinna."