Vindur hefur áhrif á badmintonkeppnina

Þrátt fyrir að badminton sé innanhússíþrótt þurfa þeir sem keppa í henni á Ólympíuleikunum í London að reikna með meðvindi, mótvindi eða hliðarvindi í sínum viðureignum.

Keppt er í Wembley Arena sem tekur mörg þúsund áhorfendur í sæti. Badmintonkeppnin er vel sótt eins og flestar aðrar greinar á leikunum og því nauðsynlegt að kveikja á loftræstingu í höllinni.

„Það væri ólíft án loftræstingar," sagði Ragna eftir sigur hennar á Akvile Stapusaityte í gær.

„Ég er þar að auki ekki vön því að keppa við svona aðstæður í höllum eins og þessari. En það var betra að byrja í mótvindi og þess vegna valdi ég að byrja þeim megin sem ég gerði eftir að ég vann uppkastið," sagði hún.

„Mér gekk svo mjög vel í fyrstu lotunni en lenti svo í ströggli í annarri lotu því það var erfiðara að spila þeim megin. En mér fannst þó betra að vera búin að vinna eina lotu og koma mér þannig í betri stöðu í viðureigninni."

Ragna segist hafa fengið að æfa í höllinni um helgina og fengið ráð frá öðrum spilurum sem kepptu þar á undan henni. En þrátt fyrir að loftkælingin væri í gangi var gríðarlega heitt í höllinni.

„Það var eins gott að ég vann þetta í tveimur lotum því ég hefði aldrei haldið þriðju lotuna út," sagði hún og hló. „Ég verð því bara að taka hina í tveimur lotum líka."

Ragna leikur síðari viðureign sína í F-riðli í kvöld og mætir þá Jie Yao frá Hollandi í hreinum úrslitaleik um sigur í riðlinum og sæti í 16-manna úrslitum.