Mark Doninger á frjálsri sölu til Stjörnunnar | Mætir Martin á morgun

Englendingurinn Mark Doninger spilar með Stjörnunni í Pepsi-deild karla út tímabilið. Doninger fékk á dögunum leyfi Skagamanna til þess að ræða við önnur lið en hann hefur látið í ljós óánægju sína með lífið á Akranesi.

Doninger hefur skrifað undir samning við Garðabæjarliðið sem gildir út yfirstandandi leiktíð.

Samkvæmt heimildum Vísis þurfti Stjarnan ekki að greiða ÍA fyrir leikmanninn.

Doninger verður í leikmannahópi Stjörnunnar sem tekur á móti KR í 12. umferð Pepsi-deildar karla á morgun. Gary Martin, fyrrum liðsfélagi hans hjá ÍA og herbergisfélagi á Skaganum, verður að sama skapi í leikmannahópi KR.

Leikurinn er í beinni útsendingu á Stöð 2 Sport og hefst klukkan 16.