Huldukona laumaði sér með indverska hópnum inn á Opnunarhátíð ÓL

Indverjar hafa kvartað formlega við mótshaldara Ólympíuleikanna í London eftir að óþekkt kona gekk með indverska hópnum inn á Opnunarhátíð Ólympíuleikana á föstudagskvöldið. Konan skar sig vel út enda allt öðruvísi klædd en aðrar konur í hópi Indverja.

Konan var klædd í rauða peysu og bláar buxur og gekk við hlið fánaberans Sushil Kumar. Hún var því í fararbroddi hópsins og stal sviðsljósinu þegar myndavélarnar sýndu heiminum indverska hópinn.

„Hún átti ekkert að vera þarna. Þetta var klárt dæmi um átroðning," sagði Muralidharan Raja forráðamaður indversku Ólympíunefndarinnar. „Við vitum ekkert hver þessi kona er eða af hverju hún gat labbað inn með okkar hóp. Við tökum þetta mál upp við mótshaldara og heimtun afsökunarbeiðni," sagði Raja.

„Hún gerði okkur vandræðaleg fyrir framan allan heiminn. Indverski hópurinn fékk tíu sekúndur á skjánum og þessi kona stal sviðsljósinu allan tímann," sagði Raja afar ósáttur. Hann veit ekki hvort konan væri indversk eða frá öðru landi.

„Hún gæti verið asísk eða frá Suður-Ameríku. Ég hef enga hugmynd," sagði Raja en alls eru 81 indverskir íþróttamenn sem taka þátt í Ólympíuleikunum í London.