Pepsi-deild karla: Þjálfarar fá að heimsækja dómarana að leik loknum

Þjálfarar í efstu deild karla í knattspyrnu fá að funda með dómurum að loknum leikjum sínum í efstu deild karla í sumar. Um tilraunaverkefni er að ræða en þetta var meðal þess sem fram kom á kynningarfundi í dag um áherslur dómaranna fyrir leiktíðina sem hefst á sunnudag.

Þorvaldur Árnason, FIFA dómari, fór yfir helstu áherslur með fulltrúum fjölmiðla í dag. Þjálfarar og fyrirliðar í tveimur efstu deildum karla fengu samskonar kynningu á dögunum.

Hér fyrir neðan eru helstu atriði sem kynnt voru á fundinum. Reglurnar gilda um dómara á öllum stigum í íslenskri deildakeppni:

Áminnt fyrir hópmótmæli

Í hópmótmælum ber dómurum að áminna a.m.k. einn þeirra sem hópar sér að dómaranum. Því til viðbótar ber að áminna hvern þann sem leggur á sig langa leið til þess að koma sjónarmiðum sínum á framfæri.

Fylgst vel með leikmönnum sem ýkja meiðsli sín

Dómurum ber að veita leikmönnum sérstaka athygli ef þeir gerast sekir um að ýkja afleiðingar líkamlegrar snertingar til þess að „fiska" gult eða rautt spjald á andstæðinginn.

Hendi eða ekki hendi

Þegar metið er hvort um hendi sé að ræða eða ekki verða fjögur atriði í fyrirrúmi:

• hreyfing handleggs í átt að knettinum
• fjarlægð mótherjans frá knettinum
• hvort staða handleggs sé eðlileg eða óeðlileg
• ef um hendi úti velli er að ræða á dómarinn að hafa í huga hvort hann hefði dæmt víti á þetta ef atvikið hefði verið inni í vítateig

Markvörður brýtur á sóknarmanni í stöðunni einn gegn einum

Ef markvörður brýtur af sér í stöðunni „maður á móti manni" ber dómaranum að sýna honum rauða spjaldið nema í undantekningartilvikum. Í þeim tilvikum þarf dómarinn að vera sannfærður um að leikmaður hefði ekki komist í upplagt marktækifæri.

• Á fundinum var sérstaklega minnst á að umræðan um aftasta mann væri á villigötum. Engu máli skiptir hvort varnarmenn séu staðsettir fyrir aftan markvörðinn þegar brotið á sér stað. Reka skal markvörðinn af velli.

Undirskyrtur og -buxur skulu vera í sama lit og keppnistreyjan

Dómarateyminu ber að ganga í skugga um það fyrir leikinn að leikmenn klæðist fatnaði sam samrýmist knattspyrnulögunum. Sérstök athygli skal vakin á því að undirskkyrtur og undirbuxur skulu vera í sama lit og keppnisskyrtan og keppnisstuttbuxurnar. Þetta voru áður tillmæli en er nú komið í reglurnar. Þá verða teip einnig að vera í sama lit og sokkarnir.

Samskiptasíður

Dómurum er bannað að tjá sig á Twitter eða Facebook varðandi einstök atvik í leikjum.

Tilraun í efstu deild karla: Þjálfarar fá að funda með dómurum

Eftir ábendingu frá Heimi Hallgrímssyni aðstoðarlandsliðsþjálfara, á fundi dómara með þjálfurum og fyrirliðum á dögunum, var ákveðið að dómarar í efstu deild karla gæfu þjálfurum tækifæri á að koma inn í klefa eftir leik til þess að fá skýringar og ef einhverjar spurningar eru. Þjálfarar þurfa þó að bíða í 5-10 mínútur eftir að leik lýkur og kurteisi er algjört skilyrði í þessum efnum. Um tilraunaverkefni er að ræða.