Mancini: Newcastle-leikurinn verður erfiðari en leikurinn við United

Roberto Mancini, stjóri Manchester City, er óhræddur að beita hinum ýmsu brögðum í sálfræðistríðinu við Manchester United og nú hefur hann gefið það út að næsti leikur liðsins á móti Newcastle á St James' Park verði erfiðari en leikurinn á móti Manchester United á mánudaginn.

Manchester City vann þá nágranna sína 1-0 á heimavelli og tók toppsætið á hagstæðari markatölu. Liðin eiga næði tvo leiki eftir en flestir eru á því að vonir United-manna liggi í að City-liðið tapi stigum á móti sjóheitu liði Newcastle á sunnudaginn.

„Newcastle-leikurinn verður okkar erfiðasti leikur, erfiðari en United-leikurinn eins skrýtið og það hljómar. Þeir eru búnir að eiga frábært tímabil og eru að berjast um sæti í Meistaradeildinni. Þeir eru með einn af bestu stjórunum í boltanum og þetta verið erfiður leikur," sagði Roberto Mancini, stjóri Manchester City.

„Þessi leikur á sunnudaginn verður bara eins og úrslitaleikur í meistaradeildinni fyrir okkur. Við eigum tvo slíka leiki eftir, á móti Newcastle og QPR. Við verðum að halda einbeitingunni til 13. maí," sagði Mancini.

Mancini heldur því enn fram að United sé sigurstranglegra liðið en United-menn eiga eftir leikir við Swansea og Sunderland.

„Við höfum ekki afrekað neitt ennþá. Við erum vissulega á toppnum en við verðum að vinna þessa tvo leiki. Við verðum að spila vel og skora mörk ef við ætlum að taka titilinn. United mun ná í sex stig í sínum tveimur leikjum," sagði Mancini.