Andstæðingar frumvarps mótmæla með frumlegum hætti

Andstæðingar væntanlegrar löggjafar í Arizona í Bandaríkjunum sem mun takmarka styrki vegna kaupa á getnaðarvörnum sendu heldur óvanalegar gjafir til löggjafa í ríkinu.

Ráðamennirnir fengu handprjónuð móðurlíf, hvert og eitt með tveimur augum sem mættu augnaráði þeirra.

Um 30 móðurlíf bárust í pósti til löggjafanna í síðustu viku. Hver sending innihélt eitt móðuríf og handskrifað bréf frá konunum sem hvöttu ráðamennina til að kjósa gegn frumvarpinu.

Frumvarpið hefur sætt mikilli gagnrýni í Arizona. Stuðningsmenn þess segja að það sé nauðsynlegt að vernda trúarfrelsi vinnuveitenda. Í mörgum tilfellum samrýmast trúarskoðanir þeirra ekki notkun getnaðarvarna. Vinnuveitendur sjá launþegum sínum fyrir sjúkratryggingu og eru getnaðarvarnirnar hluti af þeim.

Gagnrýnendur þess eru þó á öðru máli og segja að skerðing slíkra styrkja hefti friðhelgi kvenna. Margar konur nota getnaðarvarnir í læknisfræðilegum tilgangi og því þurfa Þær að færa rök fyrir notkun þeirra verði frumvarpið samþykkt.

Kosið verður um málið í næstu viku.