Ferguson segir Solskjær geta höndlað pressuna á Old Trafford

Sir Alex Ferguson, knattspyrnustjóri Manchester United, segir Ole Gunnar Solskjær, fyrrum framherja félagsins, kjörinn til þess að höndla þá pressu sem fylgi starfi knattspyrnustjóra Mancehster United. Solskjær leiddi Molde nýverið til sigurs í norsku deildinni á sínu fyrsta tímabili sem stjóri liðsins.

„Ég held að vandamálið sé að knattspyrnumenn í dag velji að gerast knattspyrnustjórar að loknum ferlinum vegna þess að þeir telji sig ekki geta gert neitt annað," sagði Ferguson við Manchester Evening News. Ferguson segir að annað hafi verið uppi á teningnum í tilfelli Solskjær.

„Ole var hins vegar alltaf ákveðinn í að starfa við leikinn að ferlinum loknum. Frá unga aldri lagði hann grunninn að því að starfa í knattspyrnu hvort sem er sem þjálfari eða knattspyrnustjóri eins og hann er í dag. Hann hefur því gefið sjálfum sér betra tækifæri en aðrir," segir Ferguson sem segir Solskjær alltaf hafa skrifað hjá sér punkta að loknum æfingum og leikjum.

Ferguson lýsir Solskjær sem vænum manni með góðan þokka. Hann geti þó verið harður þegar þarf. Solskjær leiddi smálið Molde í Noregi til sigurs í efstu deild í fyrsta skipti í sögu félagsins á síðasta tímabili.

„Ef þú tekur við félagi í Noregi sem hefur aldrei í sögu félagsins unnið deildina þá þarf knattspyrnustjórinn að hafa eitthvað til brunns að bera til þess að liðið standi uppi sem sigurvegari," segir Ferguson sem hefur séð fjölmarga af fyrrum leikmönnum sínum taka skrefið í knattspyrnustjórastólinn. Bryan Robson, Mark Hughes, Steve Bruce, Paul Ince, Roy Keane eru aðeins þekktustu nöfnin af lærisveinum Ferguson sem hafa reynt fyrir sér sem knattspyrnustjórar með misjöfnum árangri.

Ferguson, sem varð sjötugur á gamlársdag, hefur gefið út að hann verði í brúnni á Old Trafford í minnst þrjú ár til viðbótar.