Þrír úrskurðaðir í gæsluvarðhald

Tveir karlar og ein kona voru í kvöld úrskurðuð í gæsluvarðhald til 11. október að kröfu lögreglunnar á höfuðborgarsvæðinu og var það gert á grundvelli rannsóknarhagsmuna. Einn þeirra sem krafist var gæsluvarðhalds yfir er Víðir Þorgeirsson, forsprakki samtakanna, og dæmdur fíkniefnasmyglari.

Þremenningarnir voru handteknir í gærkvöld í tengslum við aðgerðir lögreglunnar gegn vélhjólagenginu Outlaws. Lögð var fram krafa um gæsluvarðhald yfir einum karli til viðbótar en dómari tók sér frest til morguns til að taka afstöðu til kröfunnar. Fram kemur í tilkynningu lögreglunnar að níu aðrir voru handteknir og vistaðir í fangageymslum í þágu rannsóknarinnar en þeim hefur nú verið sleppt úr haldi.

Aðgerðirnar í gærkvöld voru nokkuð umfangsmiklar en að þeim stóðu lögreglan á höfuðborgarsvæðinu, embætti ríkislögreglustjóra, lögreglan á Suðurnesjum og lögreglan í Árnessýslu. Embættin nutu jafnframt aðstoðar starfsmanna tollgæslunnar.